Ka jylla ka la nang syier nang syier, ong 50ngut kiba iasoh VPP

Shillong:Ki nongïalam jong kiwei pat ki seng saiñ pyrthei ba kynthup ka seng Congress, UDP bad HSPDP jong ka Nongstoiñ Konstitwensi, mynhynnin ka nohphai sngi ka 13 tarik Rymphang 2024, ki la wan ban pynïasoh noh sha ka Voice of the People’s Party (VPP).

Ia kine ki nongïalam bad dkhot jong kine ki ar tylli ki seng saiñ pyrthei kiba don haduh 50 ngut tam ba la lamkhmat da u Bah Goldenstar Nonglong uba dei ruh u kyrtong jong ka seng Congress ha ka elekshon MLA 2023, la pdiang sngewbha mynta ka sngi da u President ba rangbah ka party u Bah Ardent Miller Basaiawmoit, ha ka ophis treikam jong ka VPP kaba don ha Nongkrem.
Ha kane ka sngi la ïadonlang ruh ki MLA, Bah Adelbert Nongrum, Bah Brightstarwell Marbaniang bad Bah Heavingstone Kharpran, nalor ki nongïalam ba ha khmat jong ka party. La pynïaid ia ka jingïalang da u Dr. Kara Chen vice president jong ka VPP.

Haba ai jingkren ha kane ka sngi, na ka liang ki nongïalam jong kiwei ki party kiba wan pynïasoh mynta ka sngi ki la ong, ba ka daw ka ba pynlong ia ki ban wan rung noh sha ka party VPP ka long ba ki iohi ba tang kane ka party ka ba lah ban ialam ia u paidbah bad ka ba don nongrim shisha.
Ki la iathuh ruh ba ha kine ki snem ba dang shu dep, ki la iatrei shitom na ka bynta ban pynjop ia la u jong u kyrtong, hynrei yn da ki la jop ki shet kylla ia u paidbah.
“Haba ngi peit mynta ka jylla jong ngi ka la nangsyier nangsyier, katba nangmih ki sngi namar ki bar jylla ki la nangwan ban tur sha ka jylla jong ngi namar ka jingbym leh eiei ki ba synshar ia ka jylla, hynrei mynta ngi iohi shai ba tang ka party VPP ka ba ki dangdon jingkyrmen ban iada ia ka khyndew ka shyiap hapoh ka jylla bad ym tang katta ki la ong ruh, ba ym ba ki nongïalam ki shu kren tang da ka ktien shwa ka ilekshon, hynrei ki da pyni ruh ia ka kam ban mih sha surok ban dawa ia ka hok.

Na ka liang u bah Ardent pat u ba dei u President ka party VPP u la pynpaw ka jingsngewkhia ha kaba iadei bad ka jingjingkren ialap ilekshon bad ka jingkynnoh tad dor palat ki seng sain Hima ha ki rynsan ialap ilekshon. U bah Ardent u la kyntu ia ki nongialam seng sain hima kiba la wan pyniasoh bad ka party VPP mynta ka sngi, ba kum ka party kam pynshlur ban kren ia ilekshon ka ba long tad bad hiar dor haduh katta katta da kaba u bah Ardent u la ai nuksa “Don uwei u ba sngewjop beit da kaba byrngem phah shong ha tnum bus, katba u bym lehrain u ong pat ym lei lei, namar ha ka jingshit ka pyngngad pynban”.

U bah Ardent u la kyntu ruh ia kiwei ki nongialam jong kiwei ki seng sain pyrthei ba kin nym ialam bakla ia ki paidbah ha kaba iadei bad ka ktien ruh. U la ong ba ka ktien ka dei ka nongrim bad ong ba sa lei lada pyndonkam da ka ktien Hindi ne ba ka ktien Hindi, ka dei ka ktien jong ka Ri India, ka dei hi ka jingialam bakla.