Pyrshah ki samla St. Anthony College, ba phah phong uniform

Shillong:Ki samla pule ka St. Anthony’s College hapoh ka jingïalam ka NEHU Students Union (NEHUSU), kila pynpaw ïa ka pyrshah ïa ka hukum jong ki bor pynïaid College ba bthah ïa ki samla pule ban phong jaiñ college ne uniform haba wan sha klas.

Kine ki samla pule ki dei kiba pule ïa ka 4th Semester, ki ban sa pule sa ïa ka 5th Semester, ka semester ba khatduh ban pyndep ïa ka jingpule.
Lah ban kdew ba ka St. Anthony’s College Shillong, ha ka 29 tarik Naiwieng, ka la pynmih ïa ka hukum ba bthah ïa baroh ki samla Pule ba kin phong noh da ki jaiñ college lane Uniform haba wan sha klas naduh mynta u snem.

Halor kane, kine ki samla pule 4th Semester ki la pynlong ïa ka signature campaign ban pynpaw ïa ka jingpyrshah halor kane ka hukum jong ka College bad pyntip ba haduh 400 ngut ki samla pule kila ai jingkyrshan. Kine ki samla pule kila leit ban ïakynduh ïa u Principal ka College Rev Br Dr Albert Dkhar ban pynsngew ïa ka jingeh jong ki samla pule na kane ka hukum ba kyrkieh jong ka College.

Haba kren sha ki lad pathai khubor, u samla Arman Malngiang ula ïathuh ba ki samla pule kila dawa na u Principal ba dei ban pyllait noh ïa ki samla pule 4th Semester na ka hukum phong uniform ban wan klas.
“Ngi don satang shi semester ban pyndep ïa ka jingpule bad ki uniform ki dei kiba shongdor da T.5000 tam, hap pyrkhat lem ïa ngi kiba wan college satang shisnem,” la ong samla Arman u pyntip ba ka jingshim klas ïa ki 4th Semester kan sdang ha ka taïew ban wan bad baroh ki samla pule ka semester kila rai ban nym phong satia ïa ki uniform ban wan klas.

U ïathuh ba ïa kane ka rai ki samla pule ruh la pyntip sha u Principal khnang ba un nym shim ïa kano kano ka lynti ban pynshitom ïa ki samla pule.
Hynrei u ïathuh ba u Principal u khlem ai satia ïa kano kano ka jingkular halor kine ki jingdawa bad pyntip ba un sa rah ïakren ïa kane ka jingeh ki samla pule sha ki bor ba halor kiba dei ki Salesian.
Une u samla ula pyntip ruh ba naka liang ki samla pule kila dawa ruh na u Principal ba naduh u snem ban wan, ka College ka dei ban thoh shai ha ki Prospectus bad ki Form, ba ka long mandatory ne bym lah ïaid lait na ka jinghap phong Uniform hapoh ka College.

Haba kylli u samla Arman ula pyntip ba ïa ka hukum ba pynmih ban bthah ïa ki samla pule ban phong uniform la pynmih da ka Governing Body jong ka College.