Shah kem 7 ngut ki Khar Bangladesh

Jowai, 28 Risaw:
Ki pulit ka Infiltration kiba ap pahara ha kyrdop kaba don ha Umtyr-a , East Jaintia Hills ki la ioh ban kem haduh 7 ngut ki Khar-Bangladesh kiba la wan rung tuh sha India ban wad kam bylla sha thain Khliehriat bad Ladrym bai. Ia kitei ki 7 ngut la ioh ban kem ha ka por 3:00 baje mynstep synia mynta ka sngi katba ki dang wan da kawei ka kali Tata Sumo kaba don ia u No. AS11AC- 2868 kaba niah da uwei u khar Muslim uba la tip kyrteng kum u Md. Akadas Ali (38).
Kitei kiba la shah kem kidei kiba la tip kyrteng kum u Md. Bilal Ahmed (30), u Md. Jalil Ahmed (25), u Md. Nazir Ahmed (30), u Md. Abdul Hassan (20), u Md. Shahid Ahmed (20), u Md. Kawsar Ahmed (19) bad u Md. Imran Ahmed (19) kiba dei ki nong shong shnong ka Sylhet District ha Bangladesh.
Haba ki pulit ki la tohkit ia ki, kitei ki Khar Bangla ki la pla ba ki la wan rung tuh sha India khlem ki kot ki sla na ka bynta ban wad bylla ja kpoh. Ki pulit ki la register case pyrshah ia baroh kitei ki 7 hapoh ka kyndon 14 jong ka Foreigners Act.