Ranji Trophy: Yn iakhun final ka Meghalaya ia ka Hyderabad; rung Elite Group ka Meghalaya ha ka samoi ialeh ban wan

Shillong:Ha ka jingia khun ia ka semi final jong ka sngi bakhatduh hynnin ka sngi, ka Meghalaya ka la lah ban ioh ia ka jing jop da kaba pyn liem noh ia ka Mizoram da hynriew wicket kaba dang donkam ban ioh sa tang 28 run ban poi sha ka thong. Ka jinglehkai ba la ialeh ha Mangaldai, Assam, hynnin ka sngi, la iohi ba ka Mizoram ka la beh ia ka thong kaba 153 run ia kaba ka Meghalaya ka la pyn kut ia ka jingkamai jong ka inning kaba ar jong ka da 125/4. Ha katei ka inning kaba ar jong ka u Kishan Lyngdoh u la kamai 34 run bad dang iaineh bad kum juh ruh u Jaskirat Singh Sachdeva u ioh 19 run.

Hynnin ka step u Kishan bad u Jaskirat ki la bteng ia ka jinglehkai tang kumba shiteng kynta ei ei. Ha kane ka samoi ialeh jong ka Ranji Trophy, u Kishan u la ioh saw tylli ki half century bad ha kaba kut jong kane ka jing iakhun u la ioh 53 run, katba u Jaskirat u ioh 31 run.

Kum ban pynkyn maw, ka Mizoram ka la tied shuwa nyngkong bad kamai 144 run ia kaba ka Meghalaya ka la jubab da 145 run. Ha ka inning kaba ar, ka Mizoram ka la shah pynkut noh tang 153 run da ka jingbol bha u Aryan Borah bad u Akash Kumar Chou dhury kiba la ioh poin da 10/107 bad 8/69.
Ha ka jingsam ia ki prais u Aryan u la ioh ia ka nam player of the Match.

Ka jingioh jop jong ka Meghalaya hynnin ka sngi kan long kum u mawnongrim ha ka jinglehkai cricket jong ka jylla, ha kaba ha ka sien kaba nyngkong ka jylla kan ioh ban iakhun ha ka final jong ka plate group bad kumjuh ruh kan ioh ban shah jied sha ka elite group jong ka Ranji Trophy jong ka samoi ialeh ka ban wan. U Secretary jong ka MCA u Gideon Khar kongor u la pynpaw ka jingsngew sarong ba ki kynhun jong ka jylla naduh ka U-16 bad ka U-19 ki la shah jied lypa na ka bynta ka samoi ialeh ban wan bad kyrmen nalor kane ka kynhun ka U-23 ruh kan ioh ia ka lad ban shah jied bad da kumne yn lah ban kyntiew ia ka jinglehkai cricket ha kane ka jylla.

Ka jingiakhun ia ka final kan sdang naduh ka 17 tarik Jymmang ha kaba ka Meghalaya kan iakhun ia ka Hyderabad bad ia ka jaka ialeh yn sa pyntip ha ka jingialeh ia ka round robin stage.