Pynkut U Bah HDR Lyngdoh, ia ka rakhe 75 snem ka Pres Academy Mairang

Shillong, 28 Risaw:
U Myntri pyniaid kali ka jylla u Bah HDR Lyngdoh u la pynkut ia ka jingrakhe kut ba 75 snem ka skul Mairang Presbyterian Academy Secondary School ha kane ka sngi Balang ha Mair ang. Ha kane ka jingrakhe pynkut la don lang u MLA u Bah  Metbah Lyngdoh,  bad kiwei. Haba kren ha kane ka jingialang u Bah HDR Lyngdoh u la iaroh ia ka bor pyniaid jong ka skul  Mairang Presbyterian Academy Secondary School ia ka jingkitkhia jongki ban shakri kum ki nonghikai ban kyntiew ia ka pule puthi ha ka thain.
U la ong ba ka jingtrei shitom jong ki nonghikai lah ban paw lyngba ka jingpas bha jong ki khynnah ka skul. U la ong ba donkam ban don ruh ka jingiadei kaba jan hapdeng ki nonghikai, ki kmie ki kpa bad ki khynnah skul ban pynkhlain ia ka pule puthi.
U la kyntu ia ki khynnah skul ban kut jingmut ban pule bha khnang ba kin sa longbriew.
U Bah Metbah Lyngdoh u la iaroh ia ki skul ba la seng da ki mishoneri ha ka thain Mairang ban kyntiew ia ka pule pithi.
Shwa ia kane, u Bah HDR Lyngdoh u la pynlait ruh ia ka kot sahkynmaw ka skul katba u Bah Metbah u la pynlait ia ka jingrwai ka skul. Ki bor pyniaid ka skul ki la ai drokhas ruh ha u Bah HDR Lyngdoh ba un iakren bad ka sorkar ban ai ki jingdonkam jong ka skul.
Ha kane ka sngi la ioh ruh ia ka jingshad, ka jingrwai na ki khynnah skul, ki khynnah skul barim ruh bad la sam ia ki khusnam bad syrnot sha ki nongjop ha ka jingiakop bapher bapher.