Mynjur ka NEC T. 11 klur, ban pynthymmai ïa ka Ïewduh

Shillong:Ka North Eastern Council (NEC) kala ai jingmynjur ïa T. 11 klur ban shna pynbha bad pynwandur thymmai ïa ka Ïewduh, kaba dei ka Ïew kyntang ba la rim duh jong u paid Khasi hapoh ka Jylla.
Haba ïakren bad ki nongthoh khubor hynnin ka sngi Palei, u Secretary ka NEC K Moses Chalai ula ong, “Ngin sa pynbha bad pynkylla dur thymmai ïa ka bara Bazaar (Ïewduh). Ngi la ai jingmynjur bad ka pisa ka dei kaban dang pyllait”.

Ka NEC ka dang shong mynta ban bishar bniah ïa ka Detailed Project Report (DPR) ban pynbha bad pynwandur thymmai ïa kane ka Ïew. Ula ong ba ka jingpynlut ïa kane ka project ka long kumba T. 11 klur.
U Chalai u pyntip ba ka pisa ka dei kaba lah ban pyllait hapoh kine ki ar-lai bnai ban wan bad ka Sorkar Jylla ka dei ban pyntreikam noh mar mar ïa ka.