Rai ka Sorkar Modi, ban ker sainar ha khappud India bad Myanmar

New Delhi:U Myntri Sorkar Pdeng ba dei khmih ia ka Tnat Kam Pohiing bad Cooperation, u Amit Shah u la ong ba ka sorkar Modi ka kut jingmut ban don ia ki thain khappud ki bym lah ban rung beain.

Ha ka post jong u ha ka ‘X’ u Myntri Kam Pohiing u la ong ‘la rai ban shna ia ka jingker ha shilynter ka thain Khappud India bad ka Myanmar kaba 1643 kilometer. Ban kham pynbha shuh shuh ia ka jingpeitngor, yn siang rong ia ka lynti iaid pahara ha shilynter ka thain khappud.”

U Myntri Kam Pohiing u la bynrap ba “Na baroh ka thain khappud, ladep ban ker 10 km ha Moreh, Manipur. Shuh shuh, artylli ki pilot projek jong ka jingker sainar shiah lyngba ka Hybrid Surveillance System (HSS) ka dang iaid shaphrang mynta. Yn ker mar 1 km ha Arunachal Pradesh bad Manipur. Nalor kane, la mynjur ia ka jingtrei ban ker sainar shiah 20 km ha Manipur, bad shen yn sdang ia ka kam.”