Da ki ar shaka, aiti dorkhas ka KHNAM ha iing ki myntri sorkar

Shillong, 27 Risaw:
Ka Khun Hynniew trep National Awakening Movement (KHNAM) mynta ka sngi ka la leit aiti ia ka dorkhas ha man ka thliew iing ki myntri sorkar bad u Myntri Rangbah ka jylla ba ki dei ban hiar shuki noh namar ka jingbym lah ban ai ka jingiada ia ki bor synshar shnong bad ka jingtuklar ia ki bor jong ki.
Ka KHNAM ka la pynlong ia ka jingiaid paidbah da ki ar shaka ne motor bike ha kylleng ka sor Shillong shi bynta ban pyrta shnong ban iawer ia ki paidbah ban iamih ban leit sha ka jingiaid paidbah ban long ha ka 30 tarik Risaw.Ia kane ka jingiaid paidbah da ki ar shaka la sdang na madan Student na Jaiaw ban kyrshan ia ka Synjuk Ki Nongsynshar Shnong ka Bri u Hynniewtrep kaba la khot pynlong ia katei kajingiaid paidbah kaba heh ha katei ka sngi.
Kumba 30 tylli ki ar shaka la iaid paidbah kylleng ka sor bad ki dkhot ka KHNAM ki la leit ai ruh ia ka dorkhas ha man ki thliew iing jong ki myntri sorkar ba ki dei ban hiar shuki noh.“Ka jingthmu ba kongsan jong ka jingiaid paidbah da ka ar shaka ka long ban pynpaw ia ka jingpyrshah jur ia ka jingleh phlan duman ka sorkar jylla hapoh ka jingialam u Myntri Rangbah u Mukul Sangma bad kane ka dei ka jingkyrsiew thiah ia ka jaitbynriew” la ong u working president ka KHNAM u Bah Adelbert Nongrum haba kren hynne ka sngi shwa ban ia iaid paidbah da ka ar shaka.U la ong ba lyngba kane ka jingiaid paidbah da ka ar shaka, ka long ban pynkynmaw ia ki paidbah ba kin ia mih paidbah ha katei ka sngi ba la khot da ki nongsynshar shnong.“Ngi dawa ba u Myntri Rangbah bad ki myntri jongu ki dei ban iehnoh ia ka shuki namar ba ki paidbah ki long ki langknia hapoh ka jingsynshar kane ka sorkar” la ong u Bah Nongrum.U la ong ba u Mukul Sangma u dei u shiah jong ki paidbah bad ka imlang sahlang ka thar namar ka jingdon jong une u shiah bad kaba bha tam ban lait na ka jingthar jong ki paidbah ka long ba ki dei ban weng noh ia ki.“Ngin leit sam ia ka dorkhas phah hiar shuki ia baroh ki myntri sorkar Khasi bad u Myntri Rangbah” u la ong.U la kyntu ia ki nongsynshar shnong ba kin nym iapein bad ka jingdawa jongki watla u Myntri Rangbah un khot iakren bad ki ruh ha ka 30 tarik Risaw.