Ym pat rai ka BJP ban sei kyrtong na Nongstoin

Shillong, 27 Risaw:
Ka BJP Megha laya kam pat lah rai satia la kan sei kyrtong ne em na ka bynta ka elekshon shiteng samoi jong ka Nongstoin kaban long ha ka 21 tarik Naiwieng ban wan.
Haba iakren bad u president ka BJP Megha laya u Bah Khlur Sing Lyngdoh hynne ka sngi, u la ong ba ka party ka dang don hapdeng ka jingpyrkhat bad kumba ka long mynta ka dang ap ia ka khubor na ka BJP mandal na Nongstoin.“Ngi la ai bor ha ka BJP Mandal Nongstoin ba kan iapyrkhat halor kane ka kam bad kin iashong jingialang lashai ban iakren ia kane ka kam”, la ong u Bah Khlursing.U la ong ba ka jingbym pat rai ka party ban pynieng ne em ka dei namar ba ka dang sngew tlot ba kam pat don ktem bha kaba biang ha ka Nongstoin hynrei lada ka ioh ia ki briew ba biang, kan sa pyrkhat.U la ong ba ki nongialam ka party ha ka jylla kin shaniah ha ka jingstad ka BJP Nongstoin ba kan leh ia kane bad hadien ba la ioh ia ka jubab na ka unit na Nongstoin kan sa leh ia kaba donkam.U President ka BJP u la ong ba ka party kam pat rai ruh kan kyrshan iano lada jia ba kam nym sei kyrteng ha kane ka elekshon shiteng samoi.Ka elekshon shiteng samoi ha Nongstoin la hap ban pynlong hadien ba la khlad noh u MLA jongka, u Bah Hoping Stone Lyngdoh na ka HSPDP.Ha kawei ka liang, ka Congress bad ka HSPDP ka la pynkhreh bha ia kane ka elekshon ha kaba la don ruh bun ki kyrtong kiba pan tiket. Ka Congress ka don lai ngut kiba pan tiket kynthup kynthup u MLA barim u Dr Adviser Pariong, u MDC barim Bah Nesting Nongdhar bad u MDC shu sieh ba mynta u Bah Gabriel Wahlang. Katkum ka khubor, ka party ka lah ban ai tiket ia u Dr Pariong.Na ka liang ka HSPDP pat ka don lai ngut ba kynthup u pyrsa u Bah Hoping Stone Lyngdoh u Bah Doffley L Nonglait, u MDC Bah LG Nongsiej bad u nongniah kali jong u Bah Hoping, u Bah Daiostar Jyndiang.Kumba ka paw, imat ka tiket ka party ka lah ban leit sha u pyrsa jong u bah Hoping u Bah Doffley.
Na ka liang ka KHNAM ka dang wad briew katba ka UDP kam pat kren eiei bad ka dang jar jar haduh mynta watla ka elekshon ka la don hajan eh sa tang shi bnai duna.