Ka ophis jong ka Block ha Lumshnong, ka khang tala sah, ujor ka HSPDP, sha u myntri jylla

Shillong:Mynhynnin ka sngi u President ka Hills State People Democratic Party (HSPDP) jong ka Jaintia Hills District u bah Wanshwa Nongtdu, u la leit ban ia kynduh ia u myntri ba dei peit ia ki kam pynroi nongkyndong u A T Mondal ban ai da ka jingthoh ban kyntu ia ka sorkar ban pyntreikam noh ia ka Lumshong C&RD Block kaba la dep ban plie da u myntri rangbah ka jylla ha ka 5tarik Nohprah 2022.
U Bah Nongtdu u la ong ba kane ka Block, kaba la plie ha u snem 2022, ka don 56 tylli ki shnong bad mynta kine ki shnong ki don ha ka jingeh shano kin leit, ka sorkar ka la dep ban shimwai ia ka iing, hynrei la shu khang tala.

Haba ia dei bad ka Block la dep ban ai ei ruh ia ka jaka ban shna ia ka ophis na ka bynta ka jingmyntoi jong ki paidbah, na ka liang jong ka party HSPDP Jaintia Hills, ka kwah ban iohi ba ka sorkar kan pyntreikam noh ia kane ka Blok kaba la dep ban plie paidbah kaba ki paidbah kila kmen ha ka por ba plie ia ka.

U President ka HSPDP jong ka Jaintia Hills, la ong ba kiba bun ki shnong kiba hap ha kane ka Block ki dei ha khappud bad ka Bangladesh bad ka jylla Assam, ka jingplie ia kane ka Block da ka sorkar ka la ai jingkyrmen kaba khraw ia ki paidbah, hynrei ka jingbym pat lah ban pyntreikam ka la buh ia ki paidbah ha jingdum.

Ha kane ka jingiakynduh, na ka liang jong u myntri u la pynpaw ia ka jingsngewkmen ban ioh ia kren ha kaba ia dei bad kane ka kam bad u la ai ka jingkular ban shim khia ia kane ka kam ban peit kumno ban ioh ban pyntreikam ia kane ka Blok, u la ong ba un sa peit bniah iakane ka kam.