Lada ka Assam, kam pynphai ka Block I, ym dei ban soi mynjur, ong ka HBDRF

Shillong:Ka Hynniewtrep Border Dispute Redressal Forum – HBDRF ka la iai dawa na ka sorkar jylla ba ia ka Block -1 dei ban pynphai biang sha jylla Meghalaya.

Haba kren mynta ka sngi, ki nongialam ka BHDRF u bah G Sungoh bad bah P Phawa ryngkat u bah Thomas Passah, ki la ong ba kam iahap ia ka jingbuh ia ka Khanduli bad ka Psiar Sector namar ba kan wanrah jingeh ban ktah ia ka Block-1. Ka Block-I ka dei sha jylla Meghalaya hynrei la shu pynhap jubor ha u snem 1952. “Naduh mynshwa kam ju don ka Khanduli bad ka Psiar Sector hynrei ka don tang ka Block-1 bad ka seng kam iahap ia kane ka jingleh ka sorkar”, la ong kine ki nongialam ka HBDRF.

Kawei pat ka jingdawa ka HBDRF ka long ba lada ka sorkar Assam kam mynjur ban pynphai ia ka Block-1, u Myntri Rangbah um dei ban soi ia ka jingiateh ha ka jingpynbeit pud.
La iathuh ba haduh mynta, kam pat don satia kano kano ka jingialang halor ka kam khappud ban iapynbeit pud.

Lah ban kdew ba ka sorkar Meghalaya bad ka sorkar Assam, ki la dep ban pynbeit pud ia ki 6 tylli ki jaka na ki 12 tylli bad kaba sah mynta ki long sa 6 tylli kynthup ka bynta ha West Khasi Hills, Ri-Bhoi bad ha Jaintia Hills.