Kynmaw ia u bah Hoping,bah Marbok

Shillong, 27 Risaw:
Ha ka sngi sdang jong ka Dorbar tlang ka KHADC kaba la sdang mynta ka sngi ka iing dorbar ka la kynmaw burom ia ki ar ngut ki MDC barim ka KHADC kiba la khlad noh dang shen na kane ka sla pyrthei. Ka ing dorbar ka la kynmaw burom ia u bah Hopingstone Lyngdoh, MDC ka Pariong Konsti twensi bad ia u bah Marbok Kharpran MDC ka Sohryngkham Konsti twensi. La pule ia ka jingkynmaw sngewlem ia kitei ki 2 ngut da u CEM ka KHADC u bah Pynshngaiñ N Syiem ha kaba u la pynsngew sha ka ing dorbar ba u bah Hopingstone Lyngdoh u dei u MDc barim uba la khlad noh ha ka 26 tarik u nailur, 2015 . U la long kum u MDC na Pariong Konstitwensi ha u snem 1958-67, 1967-72, 1984 – 89 bad 1989 haduh u 1994 bad la pynkynmaw ruh ba u la long u Chief Executive Member ka KHADC ha u snem 1984 haduh 1989. U la long ruh u MLA naduh ka por ba u iakhuh elekshon haduh ka sngi ka jingiap jong u ha kaba u la bat ia kiba bun ki kam ha ka sorkar jylla. La pule ruh ia ka jingkynmaw sngewlem ia u bah Marbok Kharpran , MDC ka Sohryngkham uba la khlad noh ha ka 15 tarik u risaw, 2015 bad uba la long MDC ha u snem 2009 haduh u 2014.
U CEM haba pule ia katei ka jingthoh u la ong ba kitei 2 ngut ki la noh synniang shibun eh ha kaba ia dei ban kyntiew ia ka District council. Ia katei ka shithi sngewlem u la ong ruh ba yn phah sha kibahaing hasem bad kumjuh sha ki lad khubor. Hadien ba la pule da u CEM ki dkhot ka iing dorbar ki la ieng iwei hadien iwei ban pynpaw ia la ka jong ka jingsngew halor ka jingduh noh ia kitei ki 2 ngut ki MDC barim.
U bah Morningstar Mawsor, MDC ka HSPDP na Mawshynrut haba ia shim bynta lem ha katei ka jingkynmaw sngewlem ia u bah Hoping u la ong ba u dei u briew uba angnud shisha ban pynbeit noh ia u pud u sam jong ka jylla Meghalaya kaba ia tyngkhuh bad ka jylla Assam. Ia kane u la ong ba wat khyndiat por shuwa ba un iap ruh watla ha ka jinglong tymmen ka met pynban u la ong ba u dang ong ba yn ia leit jurip ia baroh ki pud ki sam da kaba shu iaid kjat bad u la ong ruh ba lada hap ban ia pyni da ka bor ruh kam pher, “Ka por jong u kam shah shuh hynrei ka mynsiem jong u ka thrang” ong u bah Mawsor.
U bah Jansing Tynsong, MDC ka Lyngkyrdem-Laitkroh Konstitwensi u la kren pangnud ia ka jingduh noh ia uwei na ki paralok ba ia jan eh bad u-uba dei u MDC barim ka Sohryngkham u bah Marbok Kharpran. Haba pynkynmaw ia ka por ka jingiakynduh jong u mynba ki dang ia don lang ha District Council u bah Jansing u la set jubor ia ki ummat jong u watla ka dohnud jong u ka bthei da ki jingsngewsih. U MDC ka Shella konstitwensi u bah Teiñwell Dkhar u la pynkynmaw ia ki jingnoh synniang u Maieid Hoping lyngba ki kam bah jong u kiba u la leh na ka bynta ka jaitbynriew bad kumjuh ruh ka District Council bad u la pynkynmaw ruh ia ki sngi ba u iohlad ban ia shongkai bad u bah Hoping kiba u la iathuh khana shaphang ki jingiaid kanbas jong u ha ka por elekshon bad kumjuh ruh ki jingiakynduh jong u ia u Maieid ha ki jingialang paidbah.