Ka parti, kan leit ban ai jubab sha ki paidbah, ong u heh ka NPP

Shillong:U nongialam ka NPP uba dei ruh u President ka East Khasi NPP u bah Gavin M Mylliemngap mynta ka sngi u la ong ba kiba pyrshah ia ka NPP ki shu kynthoh tang namar ba ki kwah ban kynthoh hynrei, na ka liang ka NPP ruh kan jubab ia ki jingshah kynthoh.

Haba kren mynta ka sngi, u bah Gavin uba dei ruh u MLA ka Sohra u la ong ba wat la ka party ka shah kynthoh na ka por sha ka por hynrei, kum ka party kan leit ban pynshai sha u paidbah halor ki jingshah kynthoh pyrshah ia ka party ha kaba kan pynkhreh ruh ia ka kaiphod jingjop ban ai sha ki paidbah.
“Kum ka sorkar, ngi la rai ban sei ia ki mat jingjop ha kine ki snem ba la leit. Ngim lah ban len ia ki jingkynthoh kiba bun na ka liang kiba ialeh pyrshah, na ka por sha kawei ka por, hynrei na ka liang jong ngi, kawei ka bynta ba kongsan, ka long nangne shakhmat, ia kaei kaba na ka liang ki nongkynthoh kiba shu kynthoh tang ban shu kynthoh, ka party kan leit ban pynshai ban ai ia ka jubab sha ki paidbah”, la ong u bah Gavin.

U la ong ba ka jingialang ka party mynta ka sngi jong ka East Khasi Hills, ka la rai ban pynkhlain ia ka party ha man ki block, ki unit bapher bapher na bynta ban wanrah ia ka jingjop ia ka kyrtong MP ka kong Ampareen Lyngdoh.
“Ha East Khasi Hills ki jingtynjuh kiba bun hynrei lada ngi lah ban pynkhlain ia ka jingtreikam, kan nang pynkhlain ia ka party”, la ong u bah Gavin.
Ha kajuh ka por, ba ban trei ia ka kam elekshon kam long kaba suk tang shisien san snem hynrei dei ban iaid trei baroh lynter khnang ban pynkhlain ia ka party nangne shakhmat.