Nongpoh: Ki heprit kiba hapoh 14 snem na ka Eastern Ri Bhoi, ki la ioh ban rah ia ka namlahduh ha ka Maitshaphrang U-14 Knock Out Football Tournamnet, ka lympung ialehkai kaba la pynlong da ka KSU Umsning Circle ha kaba la long ha Madan Umsning, kata hadien ba ka la lah ban pynliem noh ia ka Kynjoin Umran Sports Club da 2-1.
Haba pynkut noh ia katei ka Lympung ialehkai jong ka KSU Umsning Circle, la sakhi da ka jingdon u Samla Lambokstarwell Marngar, President rangbah ka KSU, nangta u Samla Ferdynald Kharkamni, President ka KSU NKHD Unit, u Samla James Mawphniang General Secretary ka KSU NKHD, u Bah Aibor Khongjee, uba dei uwei na ki rangialehkai bna nam ka jylla, kiwei ki nongialam ka KSU lem bad shibun ki riew rangbah ka thain Umsning.
Khyndiat haba phai sha katei ka jingialehkai jong kitei ki heprit, ka la long ka jingiakhun kaba itynnad bad pynshongshit eh ia ki paidbah, kiba la leit ban sakhi ia katei ka jingialehkai, namar watla ki dang dei tang ki heprit kiba dang hapoh 14 snem, hynrei ki la lah pat ban pyni paidbah ia kata ka sap ialehkai kaba itynnad, ha ryngkat ka mynsiem jong ka jingiakhun.
Ka kylla step jong katei ka jingiakhun, ka la kut noh ha ka jingiakhaid khlem don kiba pynkhih jar. Hynrei haba la bteng ka kylla miet jong ka jingiakhun, ki Heprit n ka Eastern Ri Bhoi, ki la ioh ia ka kabu ban thep 2 kol, hynrei shwa ban kut ka jingiakhun, ki heprit na ka Kynjoin Umran SC, ki la ioh ia ka kabu ban thep shikol bad kaba la pynlong ia ki heprit ka Eastern Ri Bhoi FC ban kan pynliem noh ia ki heprit ka Kynjoin Umran SC da 2-1.
Ka Eastern Ri Bhoi FC, kaba la ioh ia ka namladhuh ha katei ka Lympung, ka la ioh ban khur ia ka song pisa kaba T. 40 hajar ha ryngkat ka Trophy, katba ka Kynjoin Umran SC, kaba la shah rem noh ha katei ka jingiakhun phainal, ka la rah ia ka song pisa kaba T. 20 hajar lem bad ka Trophy.
Nalor ka khusnam sha kitei ki kynhun, na ka liang ka KSU ka la sam ruh ia ki khusnam shimet sha ki heprit kiba la lah ban ialehkai bha, ha kaba ia ka nam Top Scorer la rah da u Nangtei Mukhim, ia ka nam Best Player la rah da u Ledestar Tangsang, u heprit Emeral Sohiong kum u rangialehkai ba kynsai jong ka sngi bad u heprit Mewanpynskmen Kshiar kum u nongialehkai ba khynnah duh ha ka lympung.
Phi don ban ong eiei?