Puid kumba puid ia ki blang ki masi, ong ka niakha, halor ka jingleh torti ka NEIGHRIMS

Shillong:Ha ryngkat ka jingkthang bad ka jingsngewsih kiba haiing hasem, la tep donburom ia ka met ba dangsah jong ka Samla Ranisha Syiemlieh, mynta ka nohphai sngi ka 25 tarik u Kyllalyngkot 2024.

Ha shwa ban leit rah ia ka met ba dangsah jong ka samla ha u lum jingtep, la pynlong ia ka jinglehniam leh rukom kaba khatduh ha iingsah, kaba don ha ka shnong Lapalang (Pdengshnong) da u Father Jose, ha ryngkat ruh ka jingiadonlang baroh ki ba haing hasem, ki kha ki man, ki lok ki jor, ki para marjan marpa, ki paradong baroh, ki nongialam niam, ki paralok jong kane ka samla kiba la wan sngewlem bad kiwei kiwei de.
Kum ban shu pynkynmaw hangne ba ka samla Ranisha Syiemlieh, ka la khlad noh ha ka miet jong ka 23 tarik u Kyllalyngkot 2024, ha NEIGHRIMS Hospital Shillong. Katkum ka jingiathuh kiba haiing hasem jong kane ka samla, ba ka jingkhlad noh jong ka Ranisha ka dei ka jingtrei torti jong ki doktor ha katei ka Hospital.

Haba ioh ban iakren bad u kpa jong kane ka samla u bah Yespar Sohshiang u la iathuh, ba ki nongsumar ha katei ka hospital kim shem la sumar bha ia ka khun haduh ba kan da khlad noh.
U la iathuh ruh, ba ka khun ha ka jingtlot jong ka met, ka la ialeh ban thoh ia ka jingthoh ha ka kot ia kaei ka ba la jia hapoh ka kamra ICU da kaba ong, “Ki doktor bad ki nurse ha NEIGHRIMS kim shem shim khia ia ka kam bad ki shu ieh bad leh tangdep”. Shuh shuh haba ioh ban iakren bad u kpa mynta ka sngi, u la ong, ba ka khun ka la khlad noh ha ka miet jong ka 23 tarik tarik, ha ka por kumba 11 baje eiei.

“Ha ka sngi u Blei kata ha ka 22 tarik, ha ka por kumba 3 baje eiei mynstep u la ioh ia ka phone na ka khun, kaba la khot kyrpad ia u ban wan sha hospital da kaba ong, “Pa wan kloi nga la iap”, bad ha ka jingbym khlain ka met u la phah noh da u khun pyrsa ban leit peit sha hospital” la iathuh u kpa.
Kiba ha iing baroh ki la dep ban iakren bad ki nurse jong katei ka hospital, hynrei kim shem treh ban kren, hynrei ka hospital ka la shu ai tang da ka syrnot ba khlad bad ka certificate jong kane ka samla.

Haba ioh pat ban iakren bad ka niakha jong kane ka samla, ka kong Sohshiang ka la iathuh, ba kiba haiing hasem ki la sah ha ka umdum haduh mynta ba kim shem ioh ia ka daw balei ka khun jong ki ka khlad bad na kaei ka daw. Ka la pynpaw ruh ka jingsngewlyngngoh halor ka jingsumar ba ki la ai ia ka khun jong ki, da kaba shu puid khlem da tip tikna ia ka daw tynrai. “Ngi la pyrshang ban pan bad kylli ia ki kot ki sla jong ka jingpang ba ka khun jongki ka don, hynrei ki doctor bad ki nurse ki la kyntait, kaba la pynlong ia kiba ha iing hasem ba kin bitar bad sah ha ka umdum”.

Ki doctor kim shem la iathuh ba ka khun jong ki, ka don jingpang aiu, hynrei ki la shu phah rung peit shapoh hospital bad ban shimti noh ia ka met bad ka kong Sohshiang ka la iathuh ba ka rukom puid jong ki, ka long thik kumba puid blang ne puid masi bad kaba ima shisha ka rukom leh.