Bthah u heh ka AICC, ia ka sorkar ban pynsted ia ka VAB

Shillong, 26 Risaw:
U General Secretary ka AICC ba peit ia ka Meghalaya u V Naraya nasamy, u la bthah ia sorkar jylla ba ialam da u Myntri Rangbah ka jylla u Dr Mukul Sangma ba kan tynruh ia u Lat ka jylla u V Shanmuganathan ban pynsted ban pdiang noh ia ka Village Administration Bills  (VAB) ba la phah da ka KHADC bad ka JHADC.
“Ngin kyrpad ia u Myntri rangbah ka jylla bad ki myntri sorkar ban iakren bad u Lat ka jylla ban pynsted noh ban pdiang ia ka VABs  ban pynkup bor ia ki Rangbah Shnong”, la ong u Narayanasamy ha ki nongthoh khubor hynne ka sngi Nyngkong ha Shillong.
U la ong ba ka bor jong ki rangbah shnong bad ki bor shnong ym lah ban pyntlot da kano kano ka hukum jong ka Kashari.Shwa ia kane, ka Synjuk Ki Nongsynshar Shnong Ka Bri U Hynniewtrep (SNSBH) ka la iakynduh ia u bad dawa ba dei ban tuklar ban pdiang noh ia ka VAB bad ban phah sangeh ia ka jingthmu ka sorkar ban tuklar ia ki kam jong ki rangbah shnong.U heh ka AICC u la ong ba ka VAB ka dei kaba kongsan bha. “Kane ka kam lah ban pynbeit da ka lynti ka jingiakren bad iatai bad ki rangbah shnong bad ban pynthikna ba u Lat ka jylla u dei ban pdiang noh ia ka”, u la ong.U la ong biang, “hynnin ka sngi ki nongsynshar shnong ki la iakynduh ia nga bad ki la iathuh ia ki rukom ba ki ju leh naduh mynshwa hynrei kynsan kynsan ki la shah khang lad ha ka kashari”.
U la ong ba ka donkam ban iakren ban iarai lang kumno ban leh ia kane bad ban iapynbeit noh ia ka kynrum kynram.