“Bsuh ki seng trai ri, ia ka BJP ha dong mihngi”

Shillong, 26 Risaw:
U heh ka AICC ba peit ia ka Meghalaya u V Narayanasamy u la kyn noh ba ka seng Bharatiya Janata Party (BJP) ka la pyrshang ban bsuh khlieh sha kane ka dong mihngi da kaba pyndonkam da ka buit bad ki seng trai ri.
”Ka BJP ka pyr shang ban rung khlieh sha kane ka dong mihngi lyngba ki seng trai ri” la ong u V Narayanasamy haba kren sha ki nongthoh khubor hynne ka sngi ha Shillong hadien ba la iakynduh bad ki nong ialam ka party Congress.
Kane ka jingkren jong u heh ka AICC ka long hadien ba ka  Congress ka la iakynduh jingeh hadien ba la shah rem kput ha ka elekshon MDC sha ka Garo Hills Autonomous District Council (GHADC) kaba ioh tang 7 ngut na ka 29 ngut.
Ka jingmih na ka elekshon ka GHADC ka dei ka jingkhyllied khmat ia ka party ba kan trei kham bha ha ka jylla.
“Ngi la khmih lynti ba ka party kan leh bha hynrei sngewbok ba ngi jop tang 7 ngut”, u la ong.
U la ai daw ba ka jingshah rem ka dei namar ka jingshah byrngem ha ki kynhun lehnoh, ki seng bhalang ban nym iashim bynta da kaba kynnoh ia ka Congress.
Ki nongkyrshan ka Congress kila shah byrngem ban leit thep vote, la ong  heh ka AICC.
“Ka jingpynphriang khubor ki seng lehnoh, ka jingkyntait iashim bynta ki sengbhalang, ki dei ki katto katne ki daw ba ngi la rai ban nym thaw ia ka executive committee ha kane ka kynti”, la ong u Narayanasamy.
U la kyntu pat ia ki Congress ba kin trei tyngeh ban pynjop biang ia ka party na ka bynta ka elekshon shiteng samoi na Nongstoin.