Ba slem palat u Kontraktor, jurip ka FKJGP ia ka surok sha Nongbirlum

Nongpoh:Haba shimkhia ia ka jingujor ki paidbah, kiba la ujor sha ka seng halor ka jingpyndep slem bad kham leh torti u Kontrator, uba la ioh ban pyntrei ia ka surok na Nongbirthem sha Nongbir lum, ka surok PMGSY kaba don ia ka jingjrong kumba 5 Kilometer bad kaba la pynmang kumba T. 2. 57 klur, mynta ka sngi ki nongialam ka FKJGP Ri Bhoi ha ryngkat ki FKJGP Ri Bhoi Sepngi, ki la leit ban jurip ia katei ka surok, ha kaba ki la lap ba katei ka surok, kaba la dei ban sdang naduh u snem 2019, hynrei kat haduh kine ki sngi, u Kontraktor, um pat lah satia ban pyndep ia katei ka surok.

Haba leit ban jurip ia katei ka surok, la ialam da u Bah Luistar Lyngdoh, President ka FKJGP ha Ri Bhoi, lem bad ki dkhot ka FKJGP, ha kaba ka jingleit jurip jong ki ka la long naba sdang haduh bakut jong katei ka surok.

Lyngba jong katei ka jingleit jurip, kitei ki nongialam ka FKJGP, ki la lap ruh ba don ki bynta ka surok, kiba ia ka rong la lah ban khlong da ki kti bad nalor kata, ki la lap ruh ba ka rukom ban siang ia ka surok ka long kaba stang bad ba u Kontraktor, um shym la pyndep kumba la bthah ban pyntrei ne siangrong ia katei ka surok.