“Ki jingkhawai jongnga”

AIS Suja

U Blei u ong – ki jingkhawai jong Nga. “Bad u Trai u la kren ha u Moses u da ong – To kren ha ki khun Israel bad to ong ha ki, ‘kita ki jingkhawai u Trai ia kiba phin pynbna ba kin long ki Jingiaseng Bakhuid, KINE KI LONG KI JINGKHAWAI JONG NGA” Lebitekos 23:1-2. To ngin iapeit kiei kita ki jingkhawai jong u Blei. Ka jingkhawai ka jingiaidlait (Feast of Passover). Lebitekos 23:4-5. Kane ka thew ia ka jingiap u Trai Jisu halor Diengphna ha u snem 32 A.D. Kaba Ar ka dei ka jingkhawai jong u kpu ba khlem thiat (Feast of unleavened Bread). Lebitekos 23:6-8. Kane ka thew ia ka jingtep ba la thylli jong u Trai Jisu haba u la mihpat. Kaba Lai, ka dei ka jingkhawai ki soh nyngkong (Feast of First Fruit), kane ka thew ia ka jingmihpat u Trai Jisu na kiba iap. Lebitekos 23:10-11. U Jisu u dei u soh nyngkong jong ka jingmihpat na kiba iap.

Kaba saw, ka dei ka jingkhawai ki Taiew (Feast of Weeks) kaba thew ia ka por ka jingwan hiar u Mynsiem Bakhuid (Holy Spirit), kata hadien ba u Trai Jisu u la mihpat, ula don hangne ha pyrthei sa 40 sngi, 10 sngi pat hadien ba u la kiew noh sha bneng, la wan hiar u Mynsiem Bakhuid shane sha pyrthei, ia kane la khot – ka jingkhawai ki Taiew (Feast of Weeks) Lebitekos 23:15-22. Kumta naduh ba u la mihpat haduh ka sngi ka jingwan hiar u Mynsiem Bakhuid ka la long 50 sngi. Ki kam ki Apostol 2:1-47. Ia kane la khot PENTECOST.

Kumta ngi iohi ba ia ki saw tylli ki jingkhawai jong u Blei la pyndep haduh ka sngi Pentecost. Naduh ka sngi, Pentecost haduh mynta ka dang iaid ka por jingaiei ka jingtrei jong u Mynsiem Bakhuid. Bad shen kan kut noh kane ka por jingaiei jong u Mynsiem Bakhuid ha ki Balang baroh.
Ki jingkhawai kiba dang sah kiba yn sa pyndep ki long – ki jingkhawai ki Turoi (Feast of Trumpets). Lebitekos 23:23-25. Nangta, ka sngi jingpyniasuk (The Day of Atonement) Lebitekos 23:27. Kaba khadduh, ka jingkhawai ki Ing trep (Feast of Tabernacles). Lebitekos 23:24. To ngin iapeit ia kine ki jingkhawai kiba dang sah. Ia ka jingkhawai ki Turoi (Feast of Trumpets) bad ia ka sngi ka jingpyniasuk (Day of Atonement), yn pyndep hapoh kita ki Shitaiew Bakhadduh lane ki 7 snem kiba khadduh. Daniel 9:27.

Ia mynta hi, ki Israel kim don jingkhawai ei ei shuh. Mynta ka dei ka por Balait ia kaba ki Israel ki dang trei ha ki lyngkha jong ki, bad ka por ka jingtrei u Mynsiem Bakhuid ha kiba ngeit baroh. Kumno u Blei u ong ha ki Israel? “Bad haba phi ot ia ki jingmih jong ki khyndew jong phi, wat ot lut ia ki dong jong ka lyngkha jong me, men ym khar ia kata kaba sah na ka jingot jong me men iehnoh ia kata ha uba duk bad u nongwei: Nga long u Trai u Blei jong phi” Lebitekos 23:22.
Te tang shu sdang ka shi taiew bakhadduh kan sdang artat ka jingkhawai ki Turoi (Feast of Trumpets) bad ka sngi Jingpyniasuk (Day of Atonement). Bad ban tip ba la sdang ia kata ka shitaiew Bakhadduh, dei tad ynda ki israel kin pynieng ia ka Temple kaba Lai jong ki ha Temple Mount ha Jerusalem.

Ki angel kin put ia ki Turoi kan long ruh ka sngi jingpyniasuk ia ki Israel bad u Blei hapoh kane ka shi taiew Bakhadduh ba la thoh ha u Daniel 9:27 “Ynda kumta te yn pynim ia ki Israel baroh, kumba la thoh: “U Nongpyllait noh un wan mih na Seion ba un pynphai noh ia ka jingbym riewblei na u Jakob” Nong Rom 11:26.
Ia ka jingkhawai ki Ingtrep pat (Feast of Tabernacles) yn pyndep hadien jong kata ka shi taiew Bakhadduh. Daniel 9:27. Ka por ba ki Israel kin ithuh ia la u Messiah uba long u Khrist u Trai, u Syiem jong ki Jiw, u Syiem ki Syiem u Trai ki Trai, kan long ka por ha kaba u Blei un theh ia ka jingbitar halor uta u Nongpynjot uba long u ksuid u soitan kein.