Donkam ki jaka pule kiba biang hapoh ka jylla

Albert Maring

La donkam ban don noh la ki jong ki jaka pule, ki jaka ai jinghikai bapher bapher kiba bit ba biang hapoh ka jylla, naduh ki skul bah jong ka jylla, ki Medical College, ki Engineering College, ha ka Civil, ki Architect, ki designing haduh ki Skill, ki Diploma, ki Professional Course bapher bapher kiba hap hapoh ka jingpeit jingkhmih jong ka Sorkar jylla. Kumba la long mynta ka jylla jong ngi ka dang shaniah beit shabar jylla ban leit pule, leit pyntbit bad shah hikai ha ki lain bapher bapher, ha ka Jinglut kaba bun bad ka jingsiew kaba rem, ka ktah ia ka bai leit bai wan bad ha ka jingsyier mynsiem.

Bunsien kiba leit pule shabar ki mad ia ki jingshah pyndik ba bun rukom, shah ban bein, shah thombor ha kiwei kiwei ki kynhun jaitbynriew heh paid ba na kiwei kiwei ki jylla jong ka Ri India. Teng teng ha ka jaka ban wan phai da ka jingkmen ryngkat ka nam ka burom , ki sap ki phong, hap wanphai pynban da ka synduk met iap. Ki kmie ki kpa, kiba ha iing ha sem ki mad ia ki jingsngewsih, ki pait dohnud, nalor ba la pynlut ka spah ka hajar ban phah pule ia ki khun ki kti da ka jingthmu bad ka jingkyrmen ba kin longbriew man briew ba kin long eiei ha ka jingim, jong ki duh pynban ia ka mynsiem briew ba kordor.

1. Ki jingmyntoi haba don ki jaka pule, jaka ai jinghikai kiba hapoh ka jylla.
   a. Ka jingiarap shibun ban pynduna ia ka jinglut jingsep khamtam ia ki samla pule kiba wan na ki longing longsem kiba duna ha ka ioh ka kot, ka don ka jingshngain ha ka leit ka wan, lait na ki jingsyier mynsiem.
   b. Ka iarap ban kyntiew ia ka ioh ka kot jong ki paidbah ka jylla, ki paidbah long iing long sem ki lah ban buh dukan sha, dukan die jingdie katto katne tylli ha man la ki jaka don ki jaka pule bad jaka ai jinghikai.
   c. Ka iarap ban ai kam ai jam ia ki paidbah ka jylla khamtam ia ki samla ki ioh ka lad ban rung kam ban long kum ki nongtrei ha ki jaka pule bad ki jaka ai jinghikai katkum ki kyrdan bad ki jingtbit jong ki.
   Kane ka long kum ka sur jong ki paidbah ban pynsngew sha ka sorkar na ka bynta ka bha ka miat bad ka jing myntoi jong ki paidbah.