3ngut ki nongpan tiket, lah ban ioh U Dr. Adviser Pariong

Shillong, 25 Risaw:
Lashai ka sngi ka 26 tarik u risaw kan dei ka sngi ba ki heh Congress ha Nongstoiñ kin shim ia ka rai ha da uno u briew kin phah ban ia khun ha ka elekshon MLA shiteng samoi na Nongstoiñ Konstitwensi ka ban long ha ka 21 tarik u naiwieng, 2015. Kumba long haduh mynta ki la don 3 ngut ki kyrtong kiba la pan tiket na katei ka seng u Dr.Adviser Pariong,u bah Nestendar Nongdkhar bad u bah Gabriel Wahlang u MDC shu sieh na katei ka konstitwensi. Kham mynshuwa ki lad khubor ki la iathuh ba tad haduh ka por baje eiei jong ka sngi saitjaiñ dang don dang ar ngut ki kyrtong kiba pan tiket na katei ka seng, kitei ki ar ngut ki dei u bah Nestander Nongdkhar bad u Dr.Adviser Pariong, hynrei la ong ba shuwa ba ka por pdiang ia ki aplikeshon kan kut noh artad la poi sa ka aplikeshon na u bah Gabriel Wahlang.
La ong ba ka por ba la buh ban pdiang khadduh ia ki aplikeshon ka dei haduh ka por 5:00 janmiet sngi saitjaiñ. Ki lad khubor ki la iathuh ruh ba ki nongialam ka seng Congress na Nongstoiñ kim mon ia u bah Gbriel Wahlang bad la ong ba ka daw ka jingpoi slem ka aplikeshon jong u ka dei na ka daw ka jingialehkai ia rieh ki nongialam Congress ha Nongstoiñ bad u ha kaba um shym lalah ban pynpoi ia ka aplikeshon ha ka por kaba biang namar ka jingbym ioh ia kynduh ia ki nongialam. Ka jingialang rai tiket jong ka seng Congress kan sdang naduh ka por 11 baje mynstep bad ha ka por janmiet yn pynbna ia u kyrtong jong katei ka seng bad shen ha ka 28 tarik pat un leit ban thep kyrteng.
Haduh ba thoh ia kane ka khubor ki lad khubor ki la iathuh ba ka lyer tiket ha Nongstoiñ kumba long haduh mynta ka sawa jur sha u Dr.Adviser Pariong bad la ong ba lah ban dei ma u hi u ban ioh ia katei ka tiket naba ki briew ka seng Congress ha katei ka thaiñ ki la noh mynsiem lypa sha u. Hynrei kiwei pat ki lad khubor ki la iathuh ba u Dr.Pariong u lah ban ym ia khun shuh ia ka elekshon shiteng samoi namarba u kwah ban kynmaw burom ia u bah Hopingstone Lyngdoh uba dei ruh u nongialam lynti ia u sha ka saiñ pyrthei. U Dr. Pariong u dei u MLA barim jong ka Pariong Konstitwensi ha ka por shuwa ban wan ka jingphiah konstitwensi.
Hynrei haba u Rupang u la ia kren bad u Dr.Pariong lyngba ka phone u la ong ba haduh mynta um pat kwah ban ong eiei halor ka elekshon shiteng samoi ha Nongstoiñ, bad shen un sa kren sha ki lad khubor hadien ka jingialang ka ban long lashai ka sngi.