HNLC Vrs sorkar; lah u nongshun uba paw, ia u lok uba shet kylla

U Bah Sadon Blah, uba dei u ksiang jong ka seng HNLC, ula pynpaw, ia ka jingdonkam, ban ia map noh, ia ki dkhot ka HNLC, lada ka dei, ia katei ka seng, ba kan bteng ia ka jingiakren bad ka sorkar Jylla ne sorkar India bad ha ka kyntien jong utei u ksiang, u pynsngew ba ki kam pyntriem jong ka HNLC, kim da long kiba shyrkhei than, kumba la pynsngew hi ruh, da u ksiang ka sorkar India.

Ngi la dep thoh shakhmat, ba ka HNLC, ka dei ka seng beain bad ka la dei ban ia shai bha, halor katei ka mat, ha shwa ba kan sdang ka jingiakren; hynrei kam shym la jia kumta bad dei na katei ka daw, ba ka jingiakren iasuk, ka poi pynban, sha ka jingiathap ban ia khyrwit klep lane ha kawei ka kyntien, kaba ong “Lah u nongshun, uba paw, ban ia u lok uba shet kylla”.

Ka jingsniew dur kaba palat liam jong kane ka jingiakren hapdeng ka HNLC bad ka sorkar, ka dei halor ka jinghiar shuki noh jong U Vice Chairman jong katei ka seng, U Sufiyan A Hazarika lane U Manbhalang Jyrwa bad katei ka la dei lypa, ka dak kaba sniew shibun, namar ba u briew, uba la phah ban long u ksiang ha ka jing iakren, lada u iehnoh shiteng ia ka jing iakren, ka pyni, ba ka don ka jingshah pynbieit lane ka jingshah pynbor bad katei ka paw shisha tyngkrein, naba hadien katei ka jingjia, ka mih ka jingkhot sa ia ki heh duh jong katei ka seng bad katei ka thew, ba kitei ruh, kin ngat ha kajuh ka jingriam bad ka daw bah, ka long, ba ka sorkar jylla, ka kwah ban pynngat ia ki nongialam ba ha khlieh jong ka HNLC ha ka shrip bad ki shim, ba katei ka dei ka lynti ban pynduh jait ia katei ka seng.

Ka por kam pat dier, lada ka sorkar jylla, ka shim khia ia kane ka kam, ba kan iaid haduh kaba kut, kumba U Mukul Sangma, myntri rangbah barim ka Meghalaya, ula ia soi soskular bad ka ANVC, ANVC (B) nalor kiwei pat; hynrei ha ka kylla kaba ar, ka la dei ban shai bha, la ka sorkar jylla, ka kwah ban iakren ne ban pynduh jait noh ia katei ka seng bad lada ka kwah ban iasuk, ka dei ban kynmaw, ba ka la pdiang hun mynsiem, ia U bah Julius Dorphang, Bah Cherish Thangkhiew bad sa shibun kiwei de ki nongialam jong katei ka seng, ba kin wan phai sha la ka Ri bad bun na kitei ki la long MLA, MDC bad ki nongialam ha ki kynhun bapher; kumta ha kane ka sien ruh, ka dei ban pdiang, da ka mynsiem kaba khuid bad kam dei ban khublei, da kawei ka kti bad pynap tari, da kawei pat.

Na kaei kaba ngi sngewthuh, ka long ba ka HNLC, ka don ia ki ishu, kiba dei ban pyneh rngiew biang ia ka jaitbynriew bad kitei ki dei ki mat, kiba kongsan bha, ba kin ia shut nia halor miej bad ia ka liem ia ka lup, hangta ngin sa ia peit, ynda haba la buh ia ki mat ha ka miej jingiakren.