Rah lama iong bad tur paidbah   ki Tuber bad EJNC sha Civil Hospital

Jowai, 25 Risaw:
Hynnin ka sngi Saitjain, duna spah ngut ki nongshong shnong na Tuberkmai Shnong hapoh ka jingialam ka EJNC kaba dei ka sengbhalang kaba dang thymmai ki la hiar sha Jowai Civil Hospital kaba don ha Ialong ha ryngkat ki lama iong ban pyrshah ia ka jingbym shym la pdiang ka sorkar halor ka jingdawa ban weng kam shipor- tang shipor ia ki chowkidar kiba don kti ban shoh ia u Graham Lyngdoh uba dei u Nongshong shnong na Tuber-kmai shnong ha ka por ba u wan kit buh ia kawei ka nongpang sha katei ka Hospital.
Ki pulit ka WJH naduh u Addl. SP, Dy. SP, OC bad ki pyrton pulit ha ryngkat ki EAC bad ADM ki la hiar sha katei ka jaka ban khang lad ia katei ka kynhun ban wanrah ka jingthut ia ki paidbah nongwan shim dawai.
Ha katei ka jingiakhih, ka jingthmu ka EJNC kam shym la urlong namar ka jingthmu ka long ban shong kyllain mynngor hapoh ka phyllaw jong katei ka aspital hynrei bym shym la ai lad ia ki, ki la hap ban ieng sehkder tang shipor ha khmat ka kyrdop ban rung sha katei ka jaka ai jingsumar kaba la ap pahara da ki pyrton pulit.Na ka liang u ADM, ma CS Laloo u la iakren bad ki nongialam ka EJNC ha kaba ki la rai ban ia kynduh ia u DC ha ka sngi ba-ar ha ophis treikam jong u. Na ka liang ka EJNC ka la ong ba kan bteng ia ka jingiakhih lada u DC um shym la pyn-urlong ia ka jingdawa ban weng kam shipor ia ki ba donkti ban shoh ia u Graham Lyngdoh.Lah ban pynkynmaw ba u Graham Lyngdoh u la shah ktah kti ia ki Chowkidar katei ka Hospital ha ka por ba u wan buh ia kawei ka nongpang kaba dei ka para shnong jong u ha kaba ynda poi ha katei ka jaka ai jingsumar, uwei na kitei ki Chowkidar u la leh mynleh doctor ban eksamin ia katei ka nongpang. Ka huri hura ka la mih dei hadien ba u Graham u la kren pyrshah ia katei ka jingleh utei u Chowkidar.