Haba ka jingiasuk, ka kylla sha ka jingiashun, hapdeng ka sorkar bad ka HNLC

Sngew pangnud ban iohi, ba ka jingiakren iasuk hapdeng ka HNLC bad ka sorkar, ka shu kut noh, tang shiteng lynti bad katei kam dei ka dak kaba bha, hynrei, ka pyni, ba ka dei pynban, ka kam jong ki riew khawpud lane ka dak jong ka jingiashet kylla.

Ngim tip, na kaei ka daw, kaba la pynlong ia ka HNLC, ba kan kynran dien noh, na ka jingiakren iasuk bad la ka dei na ka jingshah nion tyngeh, ha ka sorkar jylla bad ka sorkar India, lane ioh lehse, ki don da kiwei pat ki daw, hynrei ngi hap ban sngewthuh, ba ka kyntien iasuk, kam dei satia, kaba don ia ka jingmut kaba rit bad ha ka jing shisha, haba la mynjur ia ka kyntien iasuk, ngi dei ban don ia ka dohnud kaba heh bad kaba iar shikatdei lane ha kawei ka kyntien, kaba ong ba ka jingsuk, kan kham kor, da ki hajar shah, ban ia ka jingiashun.

Haba shu peit narud, la iohi, ba ka HNLC, ka la bakla jur, namar ba ka dei ka seng kaba la shah khein beain, hynrei, ka leit mynjur ban iakren, khlem ki kyndon kiba biang bad kawei na kita, ka long, ban weng noh, ia baroh ki mukotduma, kiba long pyrshah ia ki nongialam jong ka seng bad la iohi, ba katba ka jing iakren, ka dang iaid; ka sorkar India, ka nang khot hajir ban tian bishar ia ki nongialam jong ka seng bad katei ka la paw shai, ba ka jing iasuk kam don satia, hynrei, ka la kylla long pynban ka jingriam lane ka jing ia pynibor hapdeng ki arliang mamla.

Ngi dei ban peit nuksa, na ki ar tylli ki jingshisha, kiba paw tyngkrein bad kawei na kita, ka dei ka jingiakren iasuk ka sorkar India bad ka ULFA, ha ka jingialam U Arabinda Rajkhowa, kaba la bteng haduh 12 snem kynthih bad nangta sa ka jingiakren bad ka NSCN (IM), kaba la iaid mynta la 30 snem tam, hynrei, ngi iohi, ba kam shym don satia ka jing ia shet kylla na kano kano ka liang, kat haduh ha kine ki sngi bad ka ULFA lei ka la poi sha ka jing iasoi soskular bad ka sorkar India, ha ki khyndiat sngi ba ladep.

Ka sorkar India lane ka sorkar Meghalaya, ki la dei ban sngewthuh shai, ba kane ka dei ka jingiakren bad ki khun ki kti lajong, lane ki iing ki sem lajong, kumba ki shait ong hi, ba ki dei ban sangeh noh, na ka jingialeh pyrshah bad ba kin wan sha ka lynti jong ka jingiakren, hynrei hangne, ka pyni shai, ba ka jing iasuk kan nym urlong, lymda ioh ban tian bishar ia ki nongialam jong katei ka seng kaikhlaw bad haba ka long kumta, ka don ka jingshisha, ba ka jingthmu, ka la bakla pleng naduh shwa ban sdang ka jingiakren.