Ka jingim jong u briew, ka don ha ka jingiaid lynti, ha kaba wat U Jisu Khrist, u khun jong U Blei, u don ha katei hi kajuh ka lynti iaid jongu, ha kaba ula wan longbriew bad hadien kata, u sa leit shongneh sha ka iing jong u kpa jongu.
Mangi ruh hangne, ngi iaid lynti, na kawei ka Khristmas, sha kawei pat, hynrei ha ryngkat, katei ka jingiaid lynti, ngi dei ban sngewthuh, ba ka rakhe Kristmas, kaba mynta u snem, kan nym long shuh kajuh, ha ka ban sa wan, la shem snem, namar ba ka lah ban kham shongshit ne ka lah ban kham pjah noh bad mangi ruh, ngi lah ban don ia ka jingsngew shongshit, kaba mynta u snem, hynrei ngim tip, ia kaei kaba ngin sngew ha ka jinglong briew, ha u snem u ban wan bad sa kawei, kaba kongsan, ka long ruh, ba ha uwei u snem, ngin kham san bad kham rangbah, da shisnem tam ka jingim.
Ki la don shibun ki jingleh kmen, naduh ka jing ia peit miet, ka jingleit sha ki jingiaseng khristmas, ka jing ialeit kai pyngngad, ka jing ia bam doh Khristmas bad wat ka jingleit ai sngewbha, sha ki longiing ba duk, sha ki tymmen, sha ki khunswet bad nangta, ki don kiba ia leit kai pyngngad bad kitei ki dei ki dak jong ka jingkhuid jingmut bad ka jingkylluid mynsiem bad kiba iahap shisha bad ka dor jong ka jingrakhe Khristmas.
Hynrei, ka jingkylli, kaba ngi dei ban sngewthuh ialade, ka long, ba kumno ngi dei ban bteng, ia ka jingiaid lynti jongngi hadien jong ka Khristmas bad la ka dei ba ngin sngewlem ia ki para briew, tang ha ka por Khristmas, lane la ka dei ba ngin rakhe bad pyn don burom ia u khun U Blei, tang ha kiba kum kine ki sngi bad kumta ter ter.
Ka jingai burom, ka leit ruh sha ki kynhun niam, ki kynhun seng bapher, kiba la noh synniang kylluid mynsiem, sha ki riew shem lanot, lane sha kiba donkam, da ki jingiarap bapher, lada dei da kaba sam blanket, kaba sam ia ki tiar bam tiar dih, da kaba pynshna ia ki iing ki sem bad katei ka dei shisha, ka dak jong ka jingrakhe ia ka sngi jong ka jingwan long briew U Jisu Khrist.
Kumba ka paw, ha kane ka jingrakhe mynta u snem, ym shym la iohi satia ia ki seng sain pyrthei, lane ki kyrtong elekshon, ba kin leit sam blanket kylleng kylleng bad katei kam dei satia, ba ka mariang, ka la nangshit ne daitthah, hynrei, ka dei namar ba kane kam dei ka snem ialeh elekshon MLA bad na kata ka daw, kiba bun kim don pisa satia ban shu bret kai, khlem jingmyntoi eiei ruh em.
Katba ka jia, hynrei kaba sngew hun mynsiem ia baroh, ka long, ba ngi la rakhe ia ka sngi Khristmas, kaba kmen bad kaba dap da ka jingieid bad ngi dei ruh ban iaid lyngba ia kane ka shisnem kaba ngin pyndep, da ka mynsiem jong ka Kristmas.
Phi don ban ong eiei?