Na ka dain kuna, ia ki kali, sha ka kyndon ia ki tyndong sawa

Ki ain ki la nang mih, na kawei ka por sha kawei pat bad haba don ki jingjia kiba bha, kim ju mih satia ki ain kiba kham bha, hynrei tang shu mih ki jingjia kiba sniew, nangta ki ioh kabu, ki nangthaw ain ban buh syndon da ki ain kiba eh tasam.

Ka nuksa kaba suk bha, ka long, ba haba lymbub briew ka thuk thuk, mih ki speed breaker, katba haba ym ju don jingshah lymbub, kumta ym ju don ba kynmaw ban buh speed breaker, lane wat ban pynbha ia ka surok, kaba sniew tasam.
Khyndiat sngi mynshwa, ngi iohi, ba ki pulit, ki la maham tyngeh, ia kiba niah kali buaid, ha kine ki sngi lehkmen jong ka Christmas bad snem thymmai bad nangta, ka pynmih hukum sa ka DC, ba ym bit shuh ban pynmih ia ki sur jing pynsawa ha ki shnong ki thaw, hadien ka 10baje mynmiet bad haduh ka por 6 baje mynstep bad lada wad ia ka daw, hangta ruh kan dei hi, namar ka jingleh thawsha jong ki katto katne, da kaba iashad, iatem, ia rwai lamwir baroh shimiet, ha ban da shai bad katei ka jingleh pohjait jong uwei arngut, ka pynlong ban mih syndon, da ka ain kaba khang syndon ban pynsawa paidbah.

Shisien pyrkhat, ngi sngew, kumba katei ka ain, ka la khia than, na bynta kiba rakhe Khristmas, namar ba ha ka miet jong ka 24tarik, kan don ka jingiaid paidbah, haduh ka por shiteng synnia lane haduh ban da shai bad nangta, ha ka 31tarik, kan don hi ka jingiaid miet, kum ka jingpdiang sngewbha ia u snem thymmai; hynrei ngin ia donbok, ba lehse ki kyndon ain jong ka Deputy Commissioner, East Khasi hills, kin nym thew ia kitei ki ar jait ki jingrakhe, hynrei, kin thwet tang ia kito kiba ia hylla ia kyrkait ha ki surok bah, lane ha ki dong bad ki shnong bapher jong ka East Khasi hills.

Ka jingrakhe ia ka Khristmas, ka la iaid la 1,700 snem kynthih (naduh ba la sdang ha ki snem 336 hadien U Khrist) bad ki la don ki jingrakhe kiba shitrhem bad kiba laitluid, ha kitei ki hajar hajar snem; hynrei ha kine ki sngi, ngi iohi, kumba ki la nang mih ki jingteh jingkhum bapher bad haba ka long kumne, ka la dei ia ki riewngeit Khristan, ba kin peit biang ialade, ioh ba ka jingrakhe ia ka jingwan longbriew U Jisu Khrist, kam dei shuh, ka jing rakhe kaba shongblei, hynrei, la imat, kumba la ioh ban pynjah burom ia katei ka sngi, da kito kiba kwah ban pynduh noh ia katei ka jingrakhe.

Ka jingngeit Blei, ha kine ki sngi, ka long, ba ngin hap ban ngeit bad ban rakhe bad ban duwai ha la ka jong ka jong ka jingsngew shimet jongngi hi, lane ha ki jingialum ialang, kiba jar jar bad katei ka long, katba kum ka jing ialam jong ka por bad ba kam dei shuh ban ialum lymbung, namar ba ki jingsniew kiba bun, ki ioh ban pynjot noh ia ka jingthmu kaba bha.