U atoskhana, ka MCCL, u lah ban ur, ha kano kano ka por, ong u ma Sniawbha

Shillong:U symbud myntri rangbah ka jylla uba peit ia ka tnad karkhana u bah Sniawbhalang Dhar ula ong ba la hap ban pynkhyllem noh ia u atoskhana ka karkhana Mawmluh Cherra Cement Limited (MCCL) namar ba ula rim palat bad u lah ban ur ha kano kano ka por, kaba lah ban buh jingma pynban ia ki briew.
Dang shen, ar tylli ki atoskhana ka MCCL kaba don ha Mawmluh, la pynpra noh hadien ba ka sorkar kam don jingmut shuh ban pynkhie im ia kane ka karkhana.

Haba kren mynta ka sngi, u bah Sniawbha lang u la ong ba ha kaba iadei bad ka MCCL, ka sorkar ka la ioh pdiang ia ka jingkyrpad na u MLA bad MDC ka thain bad ki briew, ka sorkar kan pyr khat bha shwa ha kano ka rukom kan leh kumno ban pynkhie biang ne em.
U la ong ba ka sorkar kan leh ia kaba bha tam kumno ban leh tangba kam pat shim ia kano kano ka rai kumno ban leh. U la ong ba ka sorkar kan iamir jingmut ia ki syiem, ki rangbah shnong bad ki nongtrei ruh halor kane bad ban shim pat ia ka rai kaba bha tam kumno ban leh.

Ha kajuh ka por, kumba la kren u myntri rangbah ka jylla u Conrad K Sangma ba ka sorkar ka lah ban khang noh, u bah Sniawbhalang ula ong ba ka lah ban poi sha kata ka bynta ruh tangba ka sorkar kam pat shim ia kano kano ka rai. U la ong ba ka sorkar kan pyrkhat shwa ia ka MCCL ia mynta bad hadien ka lah ban pyrkhat sa kawei ka bynta khamtam ha kaba iadei bad ka kam jngohkai pyrthei.