Ka jingkhyllem ka MCCL, ka dei kaba la shu ksih jubor, ong U Director barim

Shillong:Hadien ba ka sorkar jylla ka la rai ban khang noh syndon ïa ka jingtreikam ka MCCL, namar ba kam lah shuh ban pynïaid ïa kane ka karkhana pynmih dew bilat ba la long trai da ka sorkar, na ka liang u Sangot mynta ka sngi u la ïoh ban leit ïa kynduh bad ki nongïalam Shnong bad Ilaka jong ka Mawmluh ban twad jingmut halor ka daw ba kane ka kampani kaba mynnor ka dei kaba pynmih bun bha ka khajna hynrei mynta pat kaba tyrkhong khait.

Haba ïakren na ka liang u Director barim ka MCCL bad u Matabor jong ka Mawmluh u Bah Ju Rajee, u la ïathuh ba kane ka jingkhyllem ka MCCL kam dei kaba jia ryngkhat, hynrei kaba la shah ksih jubor ha mano re ban pynkhyllem khnang, bad u la ong ruh ba lada ka sorkar ka rai ban khang noh ia kane ka dei ban wanrah da ka kynhun tohkit ban lap mano ba donkti ne ka daw aiu ba kane ka karkhana ka khyllem bad ban lah ruh ban sei madan plaiñ ia ka bamsap kaba shyrkhei bha ha kane ka karkhana pynmih dew bilat.
U la ïathuh ruh ba kiba bun ki jyrwit jyrwat ki mih dei kiba la leh khnang da u General Manager kane ka Kompany u Bah K Lyngdoh, namar ki daw kiba tang ma u hi u tip kham bha.

Na ka liang u Secretary ka shnong u Bah Banlamkupar Lyngdoh, u la ïathuh ba ka shnong hi naduh ki khyndiat snem kiba la leit ka la ithuh na ki dak ki shin ba kane ka Kompany kan khyllem beit na ka daw ba kim pynïaid kumba dei ban pynïaid ne mismanagement bad ong ba ia kane ka jingkhyllem ka MCCL kam dei tang ka sorkar kaba hap ban shah kynnoh hynrei wat ka liang pyrshah jong ka samoi ba la dep ruh, namar u ïathuh ba ka shnong ka la pyrshang ban phah kren ïa ka mat ka MCCL ha u nongïalam barim ka liang pyrshah u Dr Mukul Sangma bad kiwei, hynrei kim shym la pyndep kumba ki la kular.

Na ka liang u Sordar ka Ilaka u Bah Pynskhembor u la ong ba ka jingkhyllem kane ka karkhana kan dei ka jingduh kaba khraw ym tang ïa ka Mawmluh, hynrei ïa ka Sohra baroh kawei.