Shillong:Ka jingap khmih lynti ki paidbah khamtam ka shnong Mawmluh bad ka thain Sohra ban pynkhie im biang ia ka karkhana Mawmluh Cherra Cement Limited ne MCCL ka la kut syndon, namar ba ka sorkar kan khang khyrdep noh ia ka.
U myntri rangbah ka jylla u Conrad K Sangma, mynta ka sngi ula ong ba ka sorkar kan ai khublei kti khadduh noh bad ki nongtrei ka MCCL da kata ka skhim Golden Handshake ne Voluntary Retirement Scheme (VRS), ha kaba ka sorkar kan siew ia baroh ki nongtrei ryngkat ka skhim kyrpang khnang ban khang noh ia kane ka karkhana, hadien ba ka sorkar ka la kut ki buit ki lad ban pynkhie im biang ia ka, na ka jingdawa jur ka jinglut.
Tangba ia kane ka rai yn sa shim bad rai kut shen, namar mynta dang iaid ka jingpynkhreh.
U la ong ba ka sorkar jylla, ka la pynlut jin haduh 300 klur tyngka eiei ha kine ki 15 snem ban pynkhie im ia ka MCCL hynrei khlem lerkam satia. Ka la pyrshang ruh ban khot ia ki kompeni nabar ban shimti ban pyniaid, hynrei kam shym la urlong satia bad halor kane ka nongrim ka sorkar kan hap ban shim ia ka rai ban khang noh syndon.
Mynshwa, ka la don ka jingthmu na ka sorkar ban leh da ka Joint Venture ha kaba ka sorkar jylla bad ka kompeni kin iadon bynta lang, hynrei kam shym la lah ban pynurlong, namar ba ki kompeni ki shem jingeh ban leh.
Ka MCCL ka la don 57 snem eiei naduh ba la seng ha ka por ka sorkar Assam bad mynta ka jingpynpra ia ki tiar rim jong kane ka karkhana ka la iaid shaid shaid.
Phi don ban ong eiei?