Pahuh pisa jubor ka KHADC, ban sam kali kit niut sha ki shnong

Ka Khasi District Council, ka dang bunkam bha, ha kine ki sngi, na ka bynta ban sam kali kit niut sha ki shnong bad la iohi, ia ka dur jong U CEM, ha kiba bun ki jaka, ba u shondur beit ialade tang bad ki trok bad katei ka dei naduh na Iewduh, shaduh sha Smit, sha Rynjah bad ter ter.

Na ka jingiathuh jong U CEM, katei ka kali kit niut, ka shongdor T.23lak bad ki Constituency ha Khasi District Council, ki don 30 tylli, ba kynthup, ia uwei u dkhot shu sieh jong ka sorkar jylla bad lada pynioh tang kawei ka kali, ha ki 30 constituency, kumta kan poi antad sha ka T.6klur eiei; hynrei katei ruh kam pat biang satia, namar, ba ha kawei ka Constituency, ki don da ki bun phew tylli ki shnong bad hangta, kan sa mih ka jing ia phoi (khamtam, haba la jan elekshon) ha kaba kiba leit bret niut, da kaba iaid kjat, kin sa khie bitar ia ki MDC lajong bad ki lah ban nym vote shuh ruh, ha ka elekshon, ka ban sa wan.

Ka 23 lak, ka shong, tang ka dor jong ka kali, hynrei, lada ia khein, sa ka bai tyre, ka bai mobile, bai draibar bad sa ki nongbud ban lum niut, kumta, kan dei ka jinglut kaba bun bha bad ngim tip, mano ban siew ia katei ka jinglut, la kan siew ka District Council, ne un siew u MDC jong ka thain, ne ki hap ia sei pisa hi ki dorbar shnong.
Haba iakren, ia kane ka mat, ka long ruh kaba donkam, ban tip, ba ki MLA, ki la bun kiba thied ambulance, hynrei, tang shu rem elekshon jah bad briew jah syndon bad kali.

Na bynta katei ka 23 lak, ban da dei ba ka Council, ka pyrkhat thymmai noh bad kata ka long, ba kan bei pisa, ia ki shnong, ba kin thied jaka ban theh niut bad ha katei ka jinglut, kin jin da la mih 23 tylli ki jaka theh niut, ha kawei pa kawei ka Constituency, ha ka jingpyniaid jong ki dorbar shnong, namar ba wat mynta ruh, kam iahap satia, ba katei ka kali, kan shu leit theh niut sha ka jaka jong kiwei pat, hynrei, ka dei ban don ka jaka, kaba la buh kyrpang, ban bret ia ki niut, ban thang ia ki niut bad ban pynkylla sboh ruh, lada donkam.

Namar ba katei ka skhim, ka dei na ka pisa jong ka sorkar, ha kaba U CEM, u kam, ba ka dei na ka Chief Ministers Special Development Fund, kumta ka la dei ban don ka jing pyrkhat kaba kham jngai bad sani, ba katei ka skhim, kan long kaba larkam bad kaba neh ha ki phew snem ban sa wan, namar ba ka pisa ruh, ka la bun bad ha kajuh ka por, ba kam dei tang ban ioh shondur lane tang ban pynbieit paidbah, ha shwa ka elekshon MDC 2024.

Ka jingpynkut, ka long, ba lada ka Council, kam pyrkhat thymmai, kumta ha ki khyndiat bnai ban sa wan, kan sa mih ka jing ujor, na kiba bun, ba kitei ki kali, kin leit bret niut sha ki jaka jong ki briew, kin leit bret niut sha ki lum ki wah lane ki lah ban leit bret niut pathar sha ki shnong ba marjan.