Shillong:Ha ka sngi ba-ar jong ka U-16 boys’ Vijay Merchant Trophy, u Apan danka Marak u la kawang bol bha hynnin ka sngi da kaba ioh hat-trick pyrshah ia ki nongtied kiba triem duh jong ka Arunachal Pradesh ba la ialeh ha Cuttack. Ha ka sngi kaba nyngkong, ka Arunachal Pradesh ka la jop ia ka toss bad jied ban tied shuwa, hynrei ka lah ban kamai tang 116/10 hadien ba u Gaurav Jyoti Thakuria u la lah ban pynkhyllem hynriew ngut ki nongtied jong ka Arunachal.
Da kaba sdang ia ka inning kaba ar hynnin ka sngi, ka Arunachal ka dang long 31/5 ha kaba u Apan danka u la ioh lypa ban pynkhyllem saw ngut ki nongtied.
Ka jingioh hat-trick jong u ka la long tang ha ki ar tylli ki over ha kaba lai ngut ki nongtied ki la hap lynter ha ki bol kiba nyngkong ki jong ki. Ha kaba sdang ka jing kawang bol jong u, u la ioh ban pynhap shuwa ia u nongtied uba 2 u Nabam Gania kaba long ha ka bol kaba san jong ka inning, bud pat sa u Tana Hurka ha ka bol kaba khatduh jong ka.
Ka jingioh weng ia u nongtied uba lai ha ka hat-trick ka jong u ka long tang ha ka bol kaba nyng kong jong ka over kaba bud ha kaba u la ioh ban weng ia u nongtied uba 4 u Nabam Jenam.
Hadien kane, u Apandanka u la ioh ban weng sa ia uwei u nong tied ha ki ar tylli ki over kiba bud bad ioh ban khur ia ka poin kaba 4/11 tang ha ki 7 over. U Paisal Ali u dei uwei pat uba la ioh ban shim wicket hynnin ka sngi da 1/11 ha ki 6 over.
Ha ka sngi kaba hashuwa, u Apandanka u la ioh ban shim 3/43 ha ki 13 over, hynrei hynnin ka sngi ka la long ka sngi ia u Thakuria uba la ioh ban shim 6/23 ha ki 11.2 over hadien ba ka Arunachal ka la shah pynkut noh tang ha ka jingkamai kaba 116 ha ki 40 over. Nalor jong u, u Mewankitbok M Khar puri u la ioh ban shim 1/16 ha ki 7 over. U Thakuria uba lehse un nang ioh ban kawang bol biang ha ka inning kaba ar jong ka Arunachal, kumta lada u ioh, u la lah ban khur sa ma u ia ka hat-tri ck hadien ba u la ioh ban weng lynter ia ar ngut ki nongtied ha ka inning kaba nyngkong jong ka.
Ka jingianeh para lok jong ki nongtied ka Meghalaya ha ka inning kaba nyngkong jong ka, ka la long hapdeng u Rudra bad u Gaurav Narleng kiba la lah ban ia kamai 122 run na ka bynta u wicket uba lai hadien ba ka Meghalaya ka la bteng na ka 49/2. Ka jingkamai run jong ka Meghalaya ka la long kaba suki ha kaba la iohi ba u Rudra u la kot ia ka 107 run ha ki 273 bol da kaba ioh thlieh khatar tylli ki 4, katba u Narleng u ioh 67 na ki 142 bol da kaba thlieh khatwei tylli ki 4.
U Paisal u kamai 34 na ki 71 bol bad u Mewankitbok 25 na ki 84 bol ki la long kiwei pat ki nongtied kiba la iarap ia ka kynhun ba kan kot ka jingkamai sha ka 300 khlieh, kaba la iarap shi bun ban lam khmat ia ka Arunachal da 188 run ha ka inning kaba nyng kong.
Phi don ban ong eiei?