Shillong:U Symbud Myntri Rangbah ka Jylla ba khmih ïa ka tnat Kam Pohïing u Bah Prestone Tynsong ha ka sngi Nyngkong, ula bthah ïa ka Voice of the People Party (VPP) ba kan kiar na ka jingleh politic ïa ka kam ba ïadei bad ka jingpynkynriah ïa ki 342 tylli ki Longïing ka Them Metor, Them Ïew Mawlong sha ka jaka ba long trai da ka Shillong Municipal Board (SMB).
Kane ka la mih shisngi hadien ba ka VPP, ka la pyrshah ïa ka rai jong ka Sorkar ban nang ai shuh shuh ïa ka jaka ha kaban pynkynriah ïa kine ki Longïing na Them Metor.
Haba ïakren bad ki nongthoh khubor, u Bah Prestone ula ong “Kito ki Nongïalam kila pynrem ïa ka rai ba shim da ka Sorkar, ki dei kiba leh politic. Ka dei tang ka jingleh kai politic khlem da tip ïa ki jingshisha, khlem da tip ïa ka jingdon ki nongshong shnong ha katei ka jaka. Namarkata, ngam kwah ban ïatai nia, ngam kwah ban pynlut por bad kum kine ki kam ba ki kren”.
U Bah Prestone ula ong, “Haba ngi ong ba ngi donkam jaka biang sa 1.4 acre ka mut ba kane ka kam kam dei ban ai sha kine ki briew. Ïa kane ka jaka yn aiti sha ka Shillong Municipal Board. Kam dei ba kin long trai ma ki namar ka jaka ka dei jong ka SMB. Kane ka dei kaba nga ong bad wat leh politic eiei. Lada phi donkam jingpynshai, wan bad ïakynduh ïa nga, ngan batai ïa baroh kiei kiei”.
Haba pynpaw ba ka VPP kam dei ban shu ïalam bakla ïa ki paidbah, u Bah Prestone ula ong, “Nga tharai katto kala biang. Balei ba ki dang ïai kren kumtei?, Balei ba ki pyrshang ban ïalam bakla ïa u paidbah? Mynno ba ngi la ong ba ngi ai ïa ka jaka sha ki?”.
“Ïa kane ka jaka yn ai sha ka SMB bad ka SMB kan sa leh ïa kaba donkam haba ïadie bad ki nongtrei jong ka Board. Nga la ïohi ïa ka jingkren jong ki bad lada ngi aiti ïa kane ka ishu sha ka VPP, kaei kaba kin leh haba kim tip ïa u ‘A’ u ‘B’ bad kim tip eiei ruh em, ki shu pyrshang beit tang ban ïalam bakla ïa ki paidbah,” ula bynrap.
U Symbud Myntri Rangbah ula ong, “Sangeh noh katto ka la biang. Ki paidbah ki sngewthuh khambha bad nga kyntu ïa kine ki nongïalam ba kim dei ban sngewthuh bakla bad ban nym ïalam bakla ïa ki paidbah ka Jylla”.
Ngam kynnoh iano iano ruh hynrei kat kum ka jingiohi jong nga ba dei U symbud myntri Bah Preston badon burom ba ialam bakla ia ki paitbah bad la shu pynbieij ia ki paitbah bapli.
Ka VPP kam shym la leh politik eiei ia ka Them Iewmawlong, kumba ka paw baroh shi katta dei ka sorkar hi kaba shu kyllain shi kyllain bad ha nga hi nga sngew ba kane ka jingleh ka sorkar ka dei ka jingleh politic.