Iam paitdohnud u Kim ka North Korea, ba kha khun duna ki kynthei ha katei ka Ri

Ka jingkha khun duna, ka la ktah jur, ia ka jingdon briew ha North Korea bad katei ka jingduna briew, ha katei ka Ri, ka la pynlung mynsiem ia u nongsynshar thombor jong ka North Korea, U Kim Jong Un, haduh, ba u da jaw ummat rangbah, ha ka jingialang bad ki kynthei ha ka Sngi U Blei bad u da kyrpad jur, ia ki kynthei, ba kin ialeh shitom, ban pynkut noh ia kane ka jingioh khun duna jongki. Ka video, kaba u iam rangbah, U Kim, ka la saphriang kylleng pyrthei, na ka daw ba u kyrpad ia ki kynthei, ba kin sdang noh ban ia ioh khun shibun shibun nangne shakhmat.

Ia kitei ki kyntien, U Kim Jong Un, ula kren ha ka jingialang jong ki kynthei, ha Pyongyang bad U Kim u ong “Ka dei ka kamram jongngi, ban pynkut noh ia kane ka jingdon khun tang khyndiat ngut bad ka dei ruh ka kamram jongngi, ban sumar bha, ia la ki khun bad kumjuh ia ki longkmie”. U Kim, ula ong, ba ka donkam kyrkieh ban ia kha khun shibun shibun, na ka bynta ban pynkhlain ia ka bor jong ka Ri hi baroh kawei.

Na ka liang ka United Nations Population Fund, ka iathuh, ba ha u snem 2023, ka jinkha khun ha North Korea, ka long tang 1.79 percent bad katei ka nang duna shibun, na ka jingkhein, kaba long 1.88 percent, ha u snem 2014. Katei ka jinghiar ki nong ioh khun, ka kham jur ha South Korea, ha kaba ha u snem 2022, ka jingioh khun, ka long tang 0.78 percent bad kaba hiar na ka 1.20percent ha u snem 2014.

La iathuh, ba ka jingduna khun ha North Korea, ka dei lyngba ka jingpynmih hukum jong ka sorkar, ha ki snem 1970-80, namar ba ka tieng, ioh ka poi sha jingbun briew palat ha katei ka Ri. Nangta, ka jingduk jingkyrduh, kaba la jia ha ki snem 1990, ka la pyniap ia ki bun bun hajar ngut ha kitei ki snem bad katei ka la nang pynduna briew shuh shuh ha katei ka Ri. Mynta ka North Korea, ka la thaw ia ka ain kaba thymmai bad kata ka long, ba kito kiba ioh khun palat 3ngut, kin ioh ei ia ka iing ba kin shong kin shah, kin ioh ia ki jingiarap, kum ka bam, ka bai dawai bad sa ki tiar ki tiar bad kin ioh ruh ia ki jaka pule kiba bha bad ki bym donkam ban siew bai skul.