Babu Kular Khongjirem
Dang mynnin ka sngi,ngi iohi tiak ha ki lad pathai khubor ba U Deputy Speaker barim ka Lok Sabha, U Kariya Munda,uba long ruh uwei na ki heh ka BJP u la kren shai bad dawa ba kito ki riewlum(tribals) kiba la ioh ia ka kyrdan Schedule Tribes(ST) kim dei shuh ban ioh ki kabu bad jingmyntoi(benefits) ne kino kino ki jingmang kyrpang(reservation) lada ki la kylla sha ki niam Islam(muslim) ne Christian namar ki dei ki niam nongwei ha ri India kumba la pynduh ne pyntreikam lem ia ka Schedule Caste(SC) sha ki jaka ri thor ne ri Dkhar.
Ka ain ka dei ban treikam solonsar kumjuh ia ki ST ne ki SC ha baroh kawei ri India.Kine ki Muslim bad Christian ki la ioh jingmyntoi ar shah(double benefits),kawei, kum ki rit paid(minority) bad kawei pat kum ki ST. Ka sorkar NDA ha Delhi hapoh ka jingialam ka party BJP ka la peitkhmat bha ia ki Muslim bad ki Kristan.Ki Muslim te ki la shah nion kylleng ka ri India hynrei ki iakhun beit sia pyrshah ia ki Hindu heh paid.Ia ki Kristan te,ka BJP ka la sdang hi ban nion kylleng ki state ka ri India hynrei kaba kham paw shynna eh ka dei ka jingjia ha Manipur ha kine ki khyndiat bnai ba la dep wat haduh mynta ruh imat ka dang iai bteng hi ha Manipur. Lada ka sorkar NDA hapoh ka jingialam ka BJP kan dang ioh bat ne wan biang ha ka bor synshar ne ioh biang ia ka sorkar pdeng(central govt) hadien ka MP Elekshon 2024, katei ka jingthmu ban pynduh ST noh ia ki riewlum ba la kylla Islam bad Kristan kan sa urlong shisha khlem artatien ha ryngkat ka Uniform Civil Code(UCC).
Ha kata ka por,kan don ka jingktah kaba khraw ia ki riewlum kiba la kylla Muslim bad Kristan kum ki Khasi-Jaintia bad Garo ha Meghalaya jongngi.Ki Khasi-Jaintia bad Garo kiba la kylla Muslim ne Kristan kin duh lut baroh ki jingmyntoi bad ki jingmang kyrpang ia ki kum ki scholarship,ki grant ing baduk,ki kam ki jam sorkar(govt job) nalor bun kiwei pat.Ki hap noh ha ka kyrdan kum ki general ne non tribal ne non ST.Shisien ba ki la duh ia ka kyrdan ST,ka khaii ka pateng ruh ka shitom ia ki ha ki jaka riewlum ne kiba hap hapoh ka jingsynshar ka District Council namar la khein ia ki kum ki non tribal.Hynrei,kaba kham ma eh ia ki ka long ba, ki lah ruh ban duh noh syndon wat ban ialeh MLA/MP/MDC ruh lait noh tang na kito ki general seat kum ka Pynthorumkhrah, Mawprem, Laban (Khasi),Phulbari bad Rajabala(Garo Hills) namar kim pdiang shuh ia ka ST jongki.
Kumno ki nongshong shnong ka Meghalaya ki sngew halor kane ka mat kaba ktah mationg phlak ia ki nongshong shnong ka ri bad ka jaitbynriew jongngi?Hato,lah ne em ban iakhun ia katei ka umsaw ne ‘erlangthari kaban wan lynshop shen ia ka ri jongngi? Kiba la sngewthuh lypa ba kim lah iakhun shuh ia kane ka bor batriem te,ki ia kren biria ban thep syndon noh sha ka kmie(BJP) ban ia kaba thep sha ka khun(NPP) jong ka sorkar synrop NDA ha kane ka MP elekshon kaban sa long shen ha u bnai April 2024.
Babu Kular khongjirem, phi dei u briew uba nga ju burom bha ïaphi kum u Nonghikai bad u nongthoh Artikil, lada ki mat ki jura kiba sohkyrdot ki wan lap ïaka Jaidbynriew Hynñiewtrep jong ngi kumne, ka sngew shonghok shongnia ba ngin nang pynkhlaiñ ïaka KHADC , da kaba ngin ai jingmut ïaka ba kan bsut ïaki aiñ don bniat haka.
Da ka bor U Blei ngim ym sheptieng ia ka. lada ka ri ka jong ngi kan nang iai khlain ha ki jingduwai shah jingit bad ha ki jingianeh, da lei lei U Blei um ym iehnoh ia ka. U Blei u long ka bor ia kine baroh. u ba pyrshah ia ka mon U Blei tea un shem ktang beit ha ka jingim jong U. namar U Blei ma U hi un pyndep ia ka iai ka Jong U. ym ma ngi ki longrynieng tang jing duna hakhmat Jong U Blei bakhraw bad ba donbor. Amen.