Pdiang sngewbha ka kong Ampareen, ban iakhun ia ka elekshon MP

Shillong:Ka kong Ampareen Lyngdoh, ka la pd iang sngewbha ia ka rai ka party bad ibit ia ka ban long ka kyrtong na ka NPP ha ka elekshon MP ban wan na Shillong Parliamentary Constituency.

Ka kong Ampa reen kaba long ruh ka myntri sorkar jylla kaba dei peit ia ka tnad ka koit ka khiah, kala ong ba kum ka longïing longsem kaba ju shakri ia u paidbah, kam don eiei ban kyntait hynrei ka pdiang ia ka rai ka party ban bynshet ia ka ban iakhun ia ka MP elekshon ban wan.
“Ka kamram jong ngi ka long ban shakri ia u paidbah, bad nga ieid ia kane ka kam shakri ia u paidbag”, la ong ka kong Ampareen.

U kpa jong ka Kong Ampareen, u bah Peter G Marbaniang, ula long u MP sha ka Lok Sabha la ar sien bad ka NPP kala pynshongrim ban ai tiket ia ka, namar ba ka dei ka longïing kaba la shakri ia u paidbah naduh u kpa jongka.
“Ka dei ka kam shakri ia u paidbah, Ngan trei shitom na bynta kane ka elekshon ruh”, ka la ong.
Hynrei kam lah ban ong eiei ia ka jingduh tiket ia kiwei namar ba ka shong ha ka jingstad ka party.
“Hadien ba ka party kala pynshong nongrim, ka party kala donkam ba ngan iakhun, Ngan hap ban trei shitom, ban pynphriang ia ki kam ka party”, ka la ong.

Ka la ong ba dei ban trei shitom ban pynphriang ia ki kam ba bha ka party, ban pynshai ia ka jingthmu pynsniew dur jong kiwei ia ka party bad ki katto katne ngut.
“Ngim dei ban shah ia ka jingtyllep ba ka party jong ngi ka long kaba kumta, kumne, ngi dei ba pynshai sha ki paidbah”, la ong ka kong Ampareen.
Ka la ong ba kan leit krih kylleng ka ri Khasi-Jaintia ban pynshai ia ki paidbah.
“Imat ka party kala pynkhreh ia nga, ka don jingpynkhreh, I pa I la long MLA, la long MP, ka longïing jong ngi, ka dei kaba shakri ia ki paidbah”, la ong ka kong Ampareen.

Haduh mynta ki seng sain pyrthei kiba pynbna ia ki kyrtong ki dei ka Voice of the People Party (VPP), ia u Dr. Ricky Syngkong bad ka NPP ka kong Ampareen Lyngdoh, katba ka Congress ka lah ban pyniakhun biang ia u bah Vincent H Pala uba dei u MP ba mynta.
Ka UDP kan sa pynbna shen ia u kyrtong MP bad kumba sngewthuh, ka la don ka jingiaknieh tiket hapdeng u bah Robertjune Kharjahrin uba dei u President barim ka HYC bad u Dr. DRL Nonglait uba dei u President ka Khasi Authors Society (KAS).