La ioh kontraktor thymmai, ha ki ar jaka, ban trei surok Shillong Dawki, na ka T.1606 klur, la dep pynlut T.776klur, ong ka NHIDCL

Shillong:Ka tnat National Highways & Infrastructure Development Corporation Ltd, ka la pyntip, ba ka la ioh biang ia ar tylli ki kompeni, ki ban trei ia ka surok na Shillong sha Dawki bad kitei ki kynthup ia ka New India Contractors & Developers Ltd. In JV with M/S BCC Buildtech Pvt Ltd bad katei kan trei ia ka package 1 bad nangta sa ka M/S YFC Projects Private Limited JV M/S ACE Construction, ha kaba kan pyntrei ia ka Package II bad la bthah ia kitei, ba kin pyndep, ia ka jingtrei, ha shwa ka 22tarik Risaw 2025, katba ka jingwad ia ki kontraktor, na bynta ka Package IV bad V, ka dang iaid shakhmat.

Ha ka jingwad jingtip jong U Rupang, lyngba ka ain jingtip paidbah, la iathuh ba ka pisa, kaba la mang, na bynta kitei ki 4 tylli ki thup, ka long T.1606.52klur, katba na katei ka pisa, la dep pynlut T.776.47 klur, na ka bynta ka civil works, ka jingsiew na bynta ka jaka, ka jingpomdieng bad ka jingpyniaid ia katei ka jingtrei ia ka surok (civil works, preconstruction activities like land acquisition – utility shifting-tree felling-forest clearance, supervision charges etc).