Shillong:U myntri ka tnad kam jngohkai ka jylla u bah Paul Lyngdoh, u la ong ba ka tamasa Cherry Blossom ka dei kaba paka tam bad kaba jop ha ka jingwan ki nongpeitkai bad ka jingtem jingrwai.
Haba kren halor kane ha ka sngi u Blei, u bah Paul u la ong ba nalor kiwei ki nongtem nabar jylla bad nabar ri, la sakhi ia ka jingioh kiew rynsan lang ki nongtem nongput na kane ka jylla ha kane ka tamasa kaba heh bad kaba paw bha.
U la ong ruh ba napdeng ki paidbah kiba wan ban sakhi ha kane ka tamasa, kumba 65 percent ki dei nabar bad kane ka pyni ba haduh katno ka jingpawnam jong kane ka tamasa ban khring ia ki briew na kylleng ki jaka nabar, bad kane ka dei ka jingjop kaba khia thew haduh katta katta na bynta ka jylla. U la ong ba ha ka tamasa Cherry Blossom ha ki ar snem ba la leit, ka jingwan ki briew ka long tang 48-52 percent, hynrei ha kane ka kynti haduh palat 70 percent ki nongiashim bynta na kane ka jylla.
Ha kajuh ka por, u bah Paul u la ong ba ka jylla kan leit sakhi ruh ia ka tamasa Cherry Blossom ha Japan ha u bnai Jymmang bad kiei kiba ki leh ki briew ha Japan, yn sa wanrah ban pynbha shuh ia ka jingrakhe ia ka tamasa Cherry Blossom ha kane ka jylla ha u bnai Naiwieng.
“U Ambassador jong ka ri Japan u la wan sakhi ia kane ka tamasa bad ngin sa kylliang ia ka prokram bad ka Japan, khnang ba ka jingrakhe ka ri Japan ia ka tamasa Cherry Blossom ha Japan ha u Jymmang, yn sa wanrah nongmuna lang shane ha u bnai Naiwieng”, la ong u bah Paul.
Next pynlong Cherry blossom fest ha Cherrapunjee