Hiar jurip ka KHADC sha Mawphlang, yn rai tarik pynlong tamasa

Shillong:U CEM ka KHADC u Bah Pynïaid Sing Syiem ha ka sngi nyngkong ha ryngkatlang bad u Chairman u Bah Lamphrang Blah bad u EM ba khmih ïa ka tnat Arts Culture ka KHADC u Bah Victor Rani ki la hiar sha mawphlang ban jurip ïa ka Khasi Heritage Village (KHV) ban pynlong ïa ka Monolith Festival kaba la thmu ban pynlong mynta u snem.

Ha kane ka jingjurip kaba la ïadonlang ruh da ki ophisar ka KHADC bad hadien ba la dep jurip u CEM ka KHADC haba ïakren bad ki lad pathai khubor u la ong ba ka KHADC ryngkat ki engineer, u Executive Engineer PWD bad ki Engineer ka Tourism department, ba la donlang na ka liang ka Hima Mawphlang, la rai ban jurip biang kane ka Khasi Heritage Village ban peit haduh katno ka kam ka la ïaid khnang ban ïoh ai kaiphod sha ka Committee.

U la ïathuh ba kumba la 2 bnai mynshwa lah wan jngoh hadien ba ka EC ka la rai ban pynlong ïa ka Monolith Festival bad la shim ka rai ban ïaid shaphrang bad kane ka jingthmu ka long ban ithuh kyrpang ban tip ïa ka riewspah ka jaitbynriew haba ïadei bad ka Riti dustur naduh ka synshar khaddar, ka jinglong trai ka khyndew ka shyiap, ka jingai jait kmie bad kiwei.
U la ong ba lyngba kane ka festival kan pyni ruh ïa ka jingriew spah ka ktien thylleij ha kaba kumba 54 tylli Hima ki don la ki rukom kren, nangta ka riam tynrai ka kup ka sem, ka bam tynrai na la ki jong ki shnong ki Hima.

U la ïathuh ruh ba ka KHADC ha ka jingïatreilang bad ka tourism department, la lah ban maramot bun ki jingdonkam ha kane ka jaka, ban pynwan dur bad ka don ka jingtei kaba heh kum ka Khasi Heritage Museum ban buh ïa ki jingdon jingem, ki kot kiba batai riti dustur naduh ki longshwa manshwa.
U la ïathuh ba ka KHADC ka la buh ban pynlong kumba 3 sngi ïa ka Tamasa bad ha kane ka jingwan jngoh la sngewhun ban lap ba ka kam ka la ïaid shakhmat.

U la ïathuh ba ka KHADC ka la buh ban lah pynlong naduh ka 14, 15 bad 16 tarik u Nohprah mynta u snem, hynrei namarba la wanjngoh yn hap rah ha ka Monolith Committee ban pynbeit ïa ki tarik lah yn lah ne em ban pynlong mynta u snem.
U la ai khublei ïa u Myntri Rangbah ka jylla, ïa u Myntri ka tnat Jngohkai u Bah Paul Lyngdoh bad ka Hima Mawphlang kiba la ïatreilang.
U la ïathuh ba na ka liang u Myntri ka tnat PWD Roads u la buh jingmang kumba T. 4 klur ban maramot ban pynthymmai ïa ki jingtei kum ki surok na ka bynta ka festival, bad ka EC KHADC kan sa rai ruh ban pynlong ïa ki prokram manla ka taïew (Weekly event) ha kane ka Heritage Village.

U la ïathuh ruh ba ha kane ka festival kin don ki jingïalehkai ki khynnah nalor kiwei pat ki jingpynbyrngia.
Ha kane ka jingjurip na ka liang ka tnat jngohkai pyrthei la wan lang da u Bah M Marbaniang EE ka Tourism.
Na ka liang u CEM u la ong ruh ba lait na ka jingmaramot bad ka jingshna thymmai, na ka liang ka sorkar ka la mang pisa na ka G 20 fund lah mang lyngba ka PWD building hynrei 4 klur ka estimate thymmai ba kynthup ïa ki surok na ka bynta ka Entry bad Exit kiba wan sha ka festival kaba wan ka jingïarap na ka sorkar, hynrei ha kaba ïadei bad ka jingpyntreikam ïa kane ka Heritage village kadei hi jong ka KHADC bad lyngba kane kan plie kam plie jam ïa ki nongshong shnong.
“Halor kane ka Village lyngba ka EC ngin sa rai noh ba kan don ka buh ïa ka prokram kaba manla ka taïew ne weekly event ban don ki kam manla ka por ym dei shuh tang shisien shisnem, bad ïa ka Management ruh yn sa shim rai da ka KHADC, khnang ba ki nongwan jngohkai pyrthei kin ïoh myntoi haba ki wan bad ban ym leit phai thylli,” ong u CEM.