Rai ka JAC ban pynsangeh shipor ka jingïakhih, ba la pyndem u VC

Shillong:Ka Joint Action Committee (JAC) jong ka NEHUTA, NEHUNSA bad NEHUSU ha ka sngi Palei, kala pynbna ban pynsangeh shwa shipor ïa ka jingïakhih ba khlem pud sngi.

Ïa kane ka jingïalang la shim hadien ba la wai ka jingïakren bad u Vice Chancellor (VC) ka NEHU.
Haba pyntip ïa kane, u Chairman ka JAC Prof Lakhon Kma ula ïathuh ba ha ka jingïalang, u VC ula pyntip ba u Technical Consultant Rohit Prasad u khlem don hapoh ka NEHU mynta la 15 sngi bad dei namar kane, ka NEHU kam donkam shuh ïa u Rohit ban don hapoh ka skulbah.

“Halor u Rohit Prasad, u VC ula pyntip ba un sa shim ïa ki sienjam ban pynkut noh ïa ka jingdon bynta u Rohit Prasad hapoh NEHU,” la ong u Prof Lakhon.
U Prof Lakhon ula pynbna ba ïa ka mynta, ka JAC kan weng shwa shipor (Suspend) ïa ka jingïakhih bad naduh lashai ka sngi, ka jingshim klas ïa ki samla pule kan long biang kumba ju long.

U Prof Lakhon ula ong ba kane ka jingweng shwa (Suspend) ïa ka jingïakhih kam mut ba la pynkut noh ïa ka jingïakhih hynrei kadei ban ai por ïa u VC ba un khot ïa ka jingïalang jong ka Academic Council (AC) ka ban long ha u bnai Nohprah.