La pynïaid shakhmat ïa ki kam ilekshon MDC, ong u MR

Shillong:U Myntri Rangbah ka jylla u Conrad K Sangma ula ong ba ka sorkar jylla ka la pynïaid shakhmat ïa ki kam ki jam na ka bynta ban pynlong ïa ka ilekshon MDC jong ka Khasi Hills Autonomous District Council (KHADC) bad Jaiñtia Hills Autonomous District Council (JHADC).

“Ki kam ki jam ki la ïaid shakhmat bad ngi la ïaid katkum ka lynti kaba dei ban ïaid, kumta ngin sa peit haba ngi ïoh ïa kano kano ka jingpyntip na ka tnat kaba dei khmih, ngin sa shim ïa ka rai ha kaba ïadei bad ka jingbuh ïa ki tarik bad kiwei kiwei,” ong u Conrad K Sangma haba ïakren bad ki nongthoh khubor.
Halor ka jingsaphriang ba lah ban pynjlan ïa ka ilekhson jong ka KHADC bad GHADC namar ka jingsahteng ban pynkylla ïa ki kyndon jong ka Sixth Schedule jong ka riti synshar ka ri, u Myntri Rangbah ula ong, “Haduh mynta ngam pat ïoh jingtip eiei bad ngam pat ïoh ïa kano kano ka jingthoh ruh bad tang ynda ïa ka jingthoh la pynpoi sha nga bad sha u Myntri uba khmih ïa ka tnat District Council Affairs kumta ngin sa lah ban kren eiei halor katei ka bynta”.