Shillong:Hadien ka jingkhlad noh ka Longkmie kaba lashah tynrah ha ka thuk thuk ha Mawlai Mawdatbaki, u Superintendent of Police (Traffic) ka East Khasi Hills District, u Kamakhya Prasad, ula ong ba u nongñiah ïa ka thuk thuk u dei uba dang khynnah bad dangrit ha ka rta bad lada hap ban pynshitom, ki kmie ki kpa ruh kin shah pynshitom katkum ki kyndon jong ka aiñ.
Haba ïakren bad ki nongthoh khubor, u Prasad ula ong ba ki Pulit ki la pynlong ïa ka jingtohkit bad ha ka jingtohkit la shem ba u nongñiah udei uba dang khynnah bad u dang ïoh tang ïa ka Learner License.
U SP ula pynpaw ba ka jingñiah marwei ïa ka thuk thuk da ka Learner’s License bad ban ñiah ïa ka thuk thuk kaba palat ïa ka 55cc la kheiñ ba ka dei ka jingpynkheiñ ïa ka aiñ. Lada lap, u nongñiah un mad ïa ka jingshah pynshitom ne ki kmie ki kpa ruh kin hap ban mad ha ka jingshah pynngat ha ki kyndon aiñ.
“Ha ka jingtohkit kaba nyngkong la shem ba u nongñiah u dei uba dang khynnah bad uba dang rit ha ka rta bad u don ïa ka Learner License. Ula pynkheiñ ïa ki jingbthah bad ki kyndon jong ka Learner License, katkum ki kyndon aiñ uba bat ïa ka Learner License lada u ñiah, u lah ban ñiah ïa ka ar shaka kaba don ne bym don Gear tangba kam dei ban palat ïa ka 50cc bad lada ñiah ha ki jaka paidbah kadei ban dei lyngba ka jingïoh jingbit na ki kmie ki kpa,” ong u SP.
U SP ula ïathuh ba une u nongñiah uba dang khynnah uba la donkti ha ka jingjia ha aksiden ha Mawlai la dep ban kem bad la rah ruh ïa u sha ïingkashari bad la rejistar case pyrshah ïa u.
U SP ula ong, namar ba une u nongñiah uba dang khynnah ula pynkheiñ ïa ki kyndon aiñ kumta ki pulit kin sa khmih bniah bad lada donkam yn sa pynshitom ruh ïa ki kmie ki kpa jong une u khynnah, kiba la ailad ïa une u khynnah ban pyndonkam ïa ka thuk thuk kaba palat ïa ka 50cc.
“Katkum ki kyndon, ki kmie ki kpa ki hap ban ai jingbit bad ban shim ïa ka jingkitkhlieh lada u nongñiah uba dang ïoh ïa ka Learner License u ñiah ïa kaba don gear bad lada jia eiei kin hap ban shim ïa ka jingkitkhlieh” ong u SP.
Ula ïathuh ba ki Traffic Police ki la peitngor bha bad kino kino kiba pynkheiñ ïa ki kyndon kin shah pynshitom katkum ki kyndon aiñ.
Ula kyntu ruh ïa ki kmie ki kpa ba ki dei ban long kiba phikir haba ki thied ïa ki thuk thuk na ka bynta ki khun jong ki namar ka lah ban don jingma lada ki ñiah khlem akor ïa ka thuk thuk bad lada shem ba ki kmie ki kpa ki pynkheiñ ïa ka aiñ, ïa ki ruh yn pynshitom lang.
“Wat la ka Shillong Traffic Police ka la trei shitom ban tehlakam ïa kane ka jingñiah khlem akor, hynrei kadei ruh ka kamram jong ki kmie ki kpa ban peit ba ki khun jong ki kim dei ban pynkheiñ ïa ki kyndon bad ki jingbthah. Lada lap ba ki pynkheiñ ïa ki kyndon aiñ, ki kmie ki kpa kin shah pynngat lang bad ki pulit kin pynngat ïa ki katkum ki kyndon aiñ,” ong u SP.
ban ong ba ki teh lakam ia ka jing niah khlem akor te ngam i ba ka long kumta, bun ki pulit Kim ju ong ei2 ne sngap la ka sngap ha ba ki ioh I ba ki nong niah ki pynher , Sam nangne /iaid nangne nangtai nangtai katba mon pyndait number plate kat ha ba mon, teng2 um din number plate shadien,bad ka over take ba ka pynher, da I ba iaid ki briew na zebra crossing ruh um ju sa ngeh,bad kumta ter2.