Khur namjop ka Hills United, ba sdang ka E.K Mawlong Memorial Trophy ha madan Mawlasnai

Nongpoh: Haba sdang ka E.K Mawlong Memorial Trophy kaba la long mynhynnin ka sngi ha madan ialehkai Mawlasnai, ka Hills United kaba dei ka kynhun ialehkai na Diphu, ka la khur ia ka namjop ba nyngkong, kata hadien ba ka la lah ban pynliem ia ka Khlieh Mawlieh Youth Club da 4-2, ha ka jingiakhun kaba la poi sha ka jingiashut Tie Breaker, namar ha ka jingiakhun hapdeng madan, ki la kut noh ha ka jingiakhaid kaba 3-3.

Ia katei ka E.K Mawlong Memorial Trophy, ka dei kaba la pynlong da ka Mawlasnai Sports Association, ha kaba ka jingthmu jong ki ba ki la pynlong ia katei ka lympung ialehkai, ka long kum ka dak ban kynmaw burom ia ki kam babha jong u (L) Bah E.K Mawlong, uba dei u MDC bad u MLA jong katei ka thain bad kaba dang hap mynshwa ha ka Umroi Constituency, namar ba u la noh synniang eh ha kiba bun ki liang ha katei ka thain.

Haba sdang katei ka lympung ialehkai, Ia sakhi da ka jingdon u Abhijit Kro, Member of Autonomous Council ka Karbi Anglong Autonomous Council, kum u kongsan, ha ryngkat ka jingdon u khun Bah EK Mawlong (Bam kwai ha dwar U Blei), bah Andrew W. Lyngdoh, u Bah Eugeneson Lyngdoh, MLA barim ka Mawphlang Constituency, u Banshai Masharing, President Mawlasnai Sports Association lem bad kiwei.