Bun kiba pan tiket, ia ka elekshon Lok Sabbha na Shillong, ong u bah Metbah

Shillong:Ka Central Executive Committee jong ka United Democratic Party (UDP) kam pat shym la rai eiei na ka bynta ki kyrtong ki ban iakhun ia ka ka election MP bad MDC, hynrei ka la rai ba ka jingsei ia ki kyrtong na ka bynta ki ar tylli ki election ban sa long, yn aiti sha ka State Election Committee.

Haba kren hadien ka jingiakynduh ka CEC, u President ka UDP, u Bah Metbah Lyngdoh u la iathuh ba la aiti ha ka election committee ban jied ia ki kyrtong na ka bynta ka election MP sha Lok Sabha bad kumjuh ia ki kyrtong MDC, kiba ka election kan sa long ha u snem ban wan.
“Ka CEC ka la mynjur ia ka State Election Committee na bynta ka MP bad ka MDC election ban jied ia ki kyrtong”, la ong u bah Metbah.

U la ong ba ka jingiatreilang bad ka HSPDP hapoh ka RDA kan long tang na ka bynta ka election MP ban sei ia u kyrtong ba iamon lang. “Ka CEC ka la pynskhem ia ka RDA ban iaid shakhmat na bynta ka MP elekshon”, la ong u President ka UDP.
Ha kaba iadei bad ka election MP na Tura Parliamentary seat, u la ong ba ka party ka la aiti ha ka Core Committee ban iatreilang bad ki nongialam ka party na Garo Hills. U la iathuh ba haduh mynta kiba pan ticket ban iakhun ia ka election MP na Shillong ki don bun ngut, katba na ka bynta ka Tura haduh mynta ym pat don kiba pan ticket.

Ka jingialang ka la bthah ruh ia baroh ki circle ban long kiba la pynkhreh ban pynkhlain ia ka party khnang ban iakhun ia ka elekshon lada ka wan ha kano kano ka por. Ka jingialang ka la buh sngi ruh ban khot ia ka jingialang jong ka Farmers’ Wing ka party ha u bnai Nohprah ban wan.