Ong U Birbor “Don kiba kham bit ia U Conrad, Prestone”

Shillong:U babu Birbor Riangtem u ba dei kum uwei na ki rangbah shnong ka shnong Langdongdai, West khasi hills District bad ha ka juh ka por kum u nongialam ka Synjuk ki Rangbah shnong, Nong trai sepngi, u la ong ba hadien ba la iohpdiang ia ka jingkyrpad, na ki ASHA ka jylla ban ai ka jingkyrshan halor ka jingiakhih jong ki, kumta, ula pynpaw, ba kum ka shnong baroh kawei, ka ai ka jingkyrshan met bad mynsiem ia ka jingdawa jong ki ASHA.

Ha ka por Covid-19 ka sorkar ka pyndon kam ha khmat ha khmat, ia ki ASHA bapli, ha kaba ki la pha, wat ia ka jingim ban trei bad kohnguh ia ka jingphah ka sorkar, hynrei mynta pat ki leh bym iohsngew pynban ia ki jingdawa jong ki.
Wat hadien ba ki ASHA, ki la pynlong ka jingiakhih da ki taiew bad ki bnai, hynrei ka sorkar u Conrad bad U Bah Prestone kim sngap bad leh bym ioh sngew eiei.

Shuh shuh u babu Birbor u ong, ba lada kim lah ban pynbiang ia ki jingdawa jong ki ASHA, ki nonghikai, ki Aganwadi yn ym don ba khang, wat ban hiar noh na ka shuki ba ki bat kum ki nongialam ia ka jylla, namar ki don bun kiba bit ban bat ia kitei ki shuki.
“Ha ka por election phi kular ban solve ia ki problem jong ki paitbah, mynta pat kawei hadien kawei ka kynhun ka hap mih sha surok ban dawa sa bad ka thombor ia ki da ki ain ki kyndon bym shongnia ban pyntieng pynsmiej” la bynrap u babu Birbor.

“Ka jingpynbiej jong phi ka mut ba phi pynbiej ia ki paitbah tang ha ka por election, hynrei mynta ynda phi la ioh ia ka bor pat phi set kyllut ia la ki shkor bad kah ia la ki khmat” ula ong shuh shuh.
U babu Birbor, u la tangon tyngeh iala sorkar da kaba ong “Wat pynbor ia ki ASHA ban shim da ki lad jingiakhih ba tyngeh hadien, pynbiang shwa ia ki jingdawa jong ki”. Kum ka jingiasnoh kti lang bad ki ASHA ka West Khasi Hills mynta ka sngi ki la pynlong da ka jingialang ha Nongstoin ha ryngkat bad ki nongtrei ASHA ka jylla ban pynrem jur ia ka sorkar halor ka jingbym shim khia, ia ki jingdawa ki ASHA.