Pynliem ki Rangbah shnong ia ka UDP, ha ka jingialehkai paralok

Nongpoh:Ha ka jingialehkai phutbol paralok hapdeng ka UDP pyrshah ia ka Synjuk Rangbah Shnong, kaba la long mynta ka sngi ha madan Pahamsyiem, ki rangialehkai ka Rangbah Shnong, ki la ioh ban khur ia ka namjop hadien ba ki la lah ban pynliem noh da 5-4, ha ka jingiakhun kaba la poi sha ka jingiashut Tie Breaker. Ia katei ka jing ialehkai paralok, la pyn long da ka UDP State Youth Wing ha ryngkat ka jingiatreilang bad ka UDP Youth Wing Ri Bhoi, ha kaba ka jingthmu jong katei ka jingialehkai, ka long kum shibynta ban pynshai paidbah halor ka jingma jong u Drok bad kaba shah ktah ia ki samla.

Ha katei ka sngi ba la don katei ka jing ia lehkai paralok bad pynshai paidbah halor u Drok, la sakhi da ka jingdon u Bah Metbah Lyngdoh, State President ka party UDP ha ka jylla, nangta u Bah Kyrmen Shylla, President State Youth Wing ka party UDP, u Bah Jemino Mawthoh, Bah Mayral Born Syiem MLA ka Nongpoh, Bah Pius Marweiñ MLA Ranikor, u Bah Synshar Lyngdoh Thabah MLA Sohiong, Bah Bala jied Ranee MDC ka Nongpoh lem bad kiwei.