Byrthen kiew iinglieh iingsaw ka shnong Sutnga ia ka PWD

Shillong, 19 Risaw:
Ka shnong Sutnga ha ka 17 tarik Risaw da kawei ka jingmut ka la rai ban leit kiew sha ki bor jong ka ain ia ka jingleh shiliang bad leh kput palat jong ki bor ka PWD, naba ki la pynheh ia ki surok Sutnga –Sumer Road, lyngba ka khlaw shnong bad ki jaka riew shimet khlem da  kynjoh ktien bad pan bor na ki shnong.
Ha ka kyrwoh ba la pynlait u rangbah shnong u Bah S D Lyngdoh u la ong ba ha ka 2 tarik Risaw 2015 ki bor shnong Sutnga ki lah leit khang ia katei ka jingpynheh, ia katei ka surok Sutnga-Sumer kaba hap naduh 3 km shakhmat bad lah buh ruh kumjuh ia ka jingujor, pyrshah ia u kontraktor u Silvanus Sukhlain.
Ka bor shnong mynta ka la mudui pyrshah ruh ia ka PWD bad u EE PWD Roads , Jowai NEC, Divison, Jowai. U la ong ba ia kane ka surok  naduh u snem 2012- 2013 ka  ioh ia ka jingmang pisa kaba T. 10 klur, naduh 3km haduh 22 km na Sutnga-Sumer –Saipung Road.
Hynrei la shem ba mynta pat ka PWD ka lah mang biang ha une u snem ia kajuh ka surok naduh 3 km haduh 22 km hapoh jong ka scheme NLCPR naka bynta ban pyniar bad siangrong haduh kumba 21,19,73030/- (21 klur 19 lak 73 hajar laiphew tyngka) ia kajuh ka surok.
U la ong kaba phylla pat balei ba ki khlem mang naduh ka 0 km ha baroh 2 sien, naduh 0 km haduh 3 km kaba iaid lyngba ka shnong halor ki jing sniew ka surok kaba lah palat ha kane ka surok.
Ka jingleh kput jong ka PWD ia ki paidbah ka shnong Sutnga ba ha u snem 2012-2013 ka PWD ka lah ioh jingmang kumba T. 81, 26, 700/- na ka bynta ban leh ia ki surok  hynrei hangne ruh ki lah ia shna pynkyllain ia ka skhim tang na ka daw ba kin ioh shna lad ia ka ban bam sap.
Nalor kane ruh sa ia kawei ka surok Bye pass, ba khot Sutnga Bye-pass uba don 3.117 km, uba peit khmih da ka PWD NEC Division Jowai, ba ha u snem 2012-2013, ki lah mang pisa ia kane na ka scheme SPA kumba 3 klur, hynrei ia kane ruh ki leh kumjuh ki pyndep tang kumba 1 km duna hynrei kita ki ba dangsah lah shu ieh noh kumto la kumba 2 snem hynrei ia ka pisa pat lah release haduh kumba 2,35,23,000/- (2klur 35 lak, 23 hajar).
Kum kine ki jingleh kput leh bein bad bamsap, ki bor jong ka shnong kim lah ban shu sngap jar ne leh matlah, bad da kawei ka jingmut kin hap ban mareh shaphrang tad haduh ban da poi wat sha kti ka CBI ruh kan ym kynran dien shuh”,la ong u Bah SD Lyngdoh ha ka kyrwoh.