Kynduh DMHO ka KSU, bym biang ka jingsumar ha Mawlasnai PHC

Nongpoh:Ki nongialam ka KSU, Eastern Border Area lem bad ka Raid Nongtung Circle, ia kaba la ialam da u Samla Banjop Maring, President Eastern Border Area, mynhynnin ka sngi ki la leit ban kynduh ia ka Dr. TS Momin DMHO ka Ri-Bhoi, kaba long kum ka jingujor bad ban pyntip sha ka halor ka jingbymbiang ha ka rukom ai jingsumar ha Mawlasnai PHC, kaba dei ka jaka sumar kaba hap ai ka jingshakri sha ki hajar ngut ki paidbah kiba sah ha katei ka thain Khappud.

Ka KSU lyngba u Samla Banjop Maring, la ong ba ka nongrim kaba la pynlong ia ka seng ba kin hap leit kynduh ia ka DMHO, ban pyntip halor ka jingdkoh ka rukom treikam hapoh katei ka jaka sumar, ka dei hadien ba ki la ioh ka jingujor na ki riew paidbah, kiba la pynpaw ba wat tang i jingpang barit kim lah ban sumar bad ba ki phah sumar beit sha kiwei ki jaka ai jingsumar.

Shuh shuh, u la iathuh ruh, ba ka seng ka la ioh ia ka jingujor ba ka Doctor kaba dei ban don ha katei ka PHC kam long kaba thikna bad kaba la wanrah jingeh shisha ia ki riew paidbah bad kiba thmu ban leit shah sumar hapoh katei ka jaka sumar, nalorkata kiwei de ki jingeh ki dei halor ka jingduna um, ka jingkhapngiah ka jaka shim dawai lem bad kiwei ki jingduna.

“Ha ka jingleit kynduh ia ka DMHO, nalor ba ngi la pynsngew halor ka jingbym biang doctor lem bad kiwei ki jingduna hapoh katei ka jaka ai jingsumar ia ki paidbah, ngi la kren ruh ia ka DMHO ba lada long kaba lah, ba ka dei ban kren sha ki bor ba kham halor, na ka bynta ban buh Doktor shuh shuh bad ruh kiba tikna ha ka rukom trei, khnang ba ki paidbah kiba donkam jingsumar, kin ioh shisha ia kata ka jingsumar kaba ki dei ban ioh” ong u samla Banjop Maring.

Ka seng namarkata, ka la ong ba kan sa leit ruh ban kynduh ia ka Myntri ka koit ka khiah, na ka bynta ban dawa ban pynbiang ka rukom ai jingsumar hapoh katei ka PHC bad lada ka long kaba donkam, ka long ban kyntiew kyrdan noh ia ka Mawlasnai PHC sha ka kyrdan CHC, namar katei ka PHC ka dei kaba la ai ka jingshakri sha kiba bun ki riew paidbah kiba sah ha katei ka thain khappud ha Ri Bhoi.