Lum u symbud MR, ïa ki ADC, ban thew jaka, da ki kor digital

Shillong:U Symbud Myntri Rangbah u Bah Prestone Tynsong u ba khmih ruh ïa ka tnat District Council Administration (DCA) hynnin ka sngi ula lum ka jingïalang jong baroh lai tylli ki District Council ban ïakren halor ka pyndonkam noh ïa ki kor Digital ban buh jingthoh ïa ki jaka puta (digitization of land Record).

Haba kren sha ki lad pathai khubor u Bah Prestone ula ïathuh ba ka sorkar India lyngba ka tnat Land Resources ka la mynjur ban bei tyngka na ka bynta ban pynrung noh ïa ki jingthoh halor ki jaka puta katkum ka juk digital ba mynta.
“Namar kata ngi la shong jingïalang bad ngi la shim rai ban bthah ïa ki District Council ba kin pyntreikam ïa ka jingbuh jingthoh ïa ki jaka puta katkum ka juk mynta lane digital da ka ba thung hi da ki Implementing Agen cy,” la ong u Bah Prestone.

U Bah Prestone ula ïathuh ba ka Sorkar kan sa thaw da ka Project Management Unit (PMU) ka ban khlieh da ki heh ka tnat District Council Affairs (DCA) ha ka jingdon lang ki dkhot na ka tnat Revenue Department, na ki ophis DC bad ki district council.
“Ngi la rai ba hadien ba la pyndep ïa kane baroh, ki District Council kin pyntreikam noh ïa ka jingkheiñ ïa ki jaka puta katkum ka juk mynta lane digitalization,” ula ong.