Ym ioh bai bam ka tnad Pule Puthi, na ka Border Area naduh 2013-15

Shillong, 15 Risaw:
Ka long kaba sngew lyngngoh ba ka tnad pule puthi ka jylla kam ju ioh pisa eiei na ka tnad Border Area ban sam ia ka baibam jong ki khynnah kiba dei na thain khappud bad kane ka la jia naduh u snem 2013-15.
Katkum ka jingtip ba la pan da ka ain wad jingtip ka RTI, ka jubab ba la ioh na ka ophis jong ka tnad pule puthi ka la pyni ba ka tnad kam don bynta eiei bad ka baibam jong ki samla pule khappud.
“Ka tnad pule puthi kam shym la leh ia kane ka baibam jong ki samla pule na thain khappud”, la ong ka jubab na u PIO na ka Education Research and Training, Shillong u J Ch Momin.
Kane ka jubab jong u PIO kane ka tnad pule ka long halor ka jingkylli ba u Rupang u la pan jingtip na ka tnad Pule Puthi, katno ka pisa ba ka ju ioh na ka tnad Border Area ha kaba iadei bad baibam jong ki samla pule khappud jong u snem 2013-15.
Ha ka jingshisha katkum ka jingtip, ka tnad Border Area ka ju phah ia ka pisa baibam jong ki khynnah pule sha ka tnad pule puthi ba kan sam ia ka baibam jong ki samla pule kiba sah ha khappud bad kiwei ki ri.
U Rupang uba la ioh ban iakren bad ki katto katne ki samla pule na thain khappud ka India bad Bangladesh, ki la ong ba ka baibam jong u snem ba la dep kim pat ioh satia haduh kine ki sngi kaba ki ju ioh.
“Kumba long ha ki snem ba la dep ia ka bai bam la ioh naduh u bnai Nailar eiei hynrei mynta u snem haduh mynta khlem pat ioh satia”, la ong ki samla pule.
La iathuh ba ia ka phom ban ioh ia ka baibam ba thymmai la dep pyndap bad la phah sha ka tnad pule puthi ka jylla hynrei lyngngoh ba wat tang ia ka baibam kaba rim pat ym pat ioh satia.
Kane ka jingslem ka sorkar jylla ban pynlait ia ka pisa ka la pynkhuslai ia ki namar ba ki samla pule ba wan na ka longing baduk, ka baibam ka long ka jingiarap ia ki ba kin ioh ban kyrshan bai kot bai sla.