Ka BJP kan nym jop tang kawei ruh

Shillong, 16 Risaw:
U Myntri Rangbah ka jylla u Dr Mukul Sangma u la sngew bitar ia ka jingjop ka BJP na Zikzak ha kane ka elekshon MDC sha ka Garo Hills Autonomous District Council (GHADC) kaba la pyn bna hynnin ka sngi.
“Ngan iathuh ia phi, ka BJP kan nym jop wat tang kawei ruh na Garo Hills ha u snem 2018”,la ong u Myntri Rangbah haba kylli ki nongthoh khubor mynta ka sngi ha ka nongbah.
Ym lah ban tip haduh katno u Myntri Rangbah u la sngew skhem ban iathuh lypa ba ka BJP kan iaid thylli na Garo Hills ha u snem 2018.
Ka BJP ka la jop na Zikzak constituency kaba hap ha ka Assembly constituency ka Mahandraganj jong ka lok jongu.
U la pynksan nia da kaba ong ba ka vote ba ka BJP ka ioh ha ka elekshon MLA ba la dep na Mahendrganj ka dei kajuh kaba ka ioh mynta ha ka elekshon MDC namar ba ha ka MDC ka konstiwtensi ka kham rit ba la pynpharia bun na kawei ka MLA constiteuncy bad bun kiwei ki shnong bym treh BJP kim hap shuh ha ka Zikzak.
Kane ka jingkren jong u Myntri Rangbah ka long shisngi hadien ba la mih ka elekshon MDC ha kaba ka Congress ka jop tang 7 ngut na ka 29 ngut, katba ka NNP ka jop 10 ngut, ki kyrtong shimet ki jop 7 ngut, ka GNC ka jop 3 ngut, ka BJP bad NCP mar kawei.
Halor ka jingshah rem ka Congress, u Myntri Rangbah u la ong ba ka daw ka dei namar ka jingtreikam jong ki bor pynsyier kiba wan na kawei ka ri bad ruh ka jingpynher khubor ba ka  Congress ka iashah bar jylla da kaba ai tiket, nalor ka jinglap ka RTI ia ka jingpyndonkam bakla ia ka pisa ha ka GHADC.
“Kawei ka daw ba kongsan ka dei namar ba ka la don ka jingbakla ha ka jingjied ia ki kyrtong”, la ong u Mukul bad bynrap, kampher, ngi hap ban burom ia ka rai jong u paidbah”,.
U la ong ba ka party ka la rai ban shong ha ka liangpyrshah bad la dep iakren pynbeit bad ki heh ka AICC na Delhi halor kane.
“Ngin nym thaw ia ka EC bad ngi la rai ban shong ha ka liangpyrshah”, la ong u Mukul.
Ha kawei ka liang u President ka Meghalaya Pradesh Congress Committee (MPCC) Bah DD Lapang u la ong ba ka party ka pdiang ia ka rai jong u paidbah bad ka la rai ban shong ha ka liangpyrshah ha GHADC namar ba kam shym la ioh ia ka jingbun paid ban thaw ia ka Executive Committee (EC).
“Ngi la iakren bad ki nongialam ka AICC bad ngi la rai ban shong ha ka liangpyrshah ha GHADC”, la ong u Bah Lapang.
Haba kylli hato kam dei ka jinglong nongialam kaba pynhiar ia ka party ha kane ka elekshon, u Bah Lapang u laong, “ha ka elekshon don ka por ba ngi ioh kumba ngi khmih lynti bad don ka por ba ngim ioh kumba ngi khmih lynti”.